జలుబుకు చెక్ పెట్టే హోమ్ రెమెడీలు

Posted: 09/01/2015 11:11 AM IST

ప్రస్తుత ఆధునిక యుగంలో వాతావరణ కాలుష్యం ప్రభావం కారణంగా రకరకాల వ్యాధులు తీవ్రంగా సంతరించుకుంటున్నాయి. అందులో చిరుజబ్బులు మరింత ఎక్కువగా ప్రబలుతున్నాయి. ముఖ్యంగా దగ్గు, ఒళ్లునొప్పులు, జలుబు వంటివి చిన్నా, పెద్దా అని తేడాలేకుండా ప్రతిఒక్కరికి సోకుతున్నాయి. వీటిలో దగ్గు, నొప్పులు త్వరగా తగ్గిపోతాయి కానీ.. జలుబు మాత్రం అంత సులభంగా వదలదు. ఇది ఒక్కసారి పట్టిందంటే చాలు.. ఒక పట్టాన పోదు. అంతేకాకుండా అది అంటు వ్యాధి కావడంతో ఒకరినుంచి మరొకరికి ప్రబలే అవకాశం ఉంది. అలాంటప్పుడు ఏమాత్రం ఆలస్యం చేయకుండా కొన్ని జాగ్రత్తలు పాటిస్తే చాలు. ఇంట్లో వుండే రెమెడీల ద్వారా ఈ సమస్య నుంచి త్వరగా ఉపశమనం పొందవచ్చు.

* జలుబును తగ్గించడంలో తులసి బాగా పని చేస్తుంది. ఒక పాత్రలో గుప్పెడు తులసి ఆకులు, చిటికెడు రాళ్ల ఉప్పు రెండింటిని వేసి, బాగా నమలాలి. అలా చేసినప్పుడు వచ్చే రసాయనాన్ని మింగడం ద్వారా జలుబు తీవ్రత తగ్గుతుంది. తులసి టీ తాగినా జలుబు తగ్గుతుంది. జిందా తిలిస్మాత్ జలుబుకు తక్షణ విరుగుడుగా పని చేస్తుంది. ప్రతి రోజూ మూడు పూటలా మూడు చుక్కల జిందా తిలిస్మాత్ ఒక టేబుల్ స్పూన్ పాలు లేదా టీతో తీసుకుంటే జలుబు ఇట్టే తగ్గుతుంది.

* జలుబు చేసినప్పుడు రాత్రిపూట పడుకునే ముందు వేడిపాలలో చిటికెడు పసుపు వేసుకుని తాగితే జలుబు తగ్గు ముఖం పడుతుంది. రెండు కప్పుల నీటిలో చిన్న అల్లం ముక్క, దాల్చిన చెక్క వేసి, బాగా మరిగించి.. తర్వాత ఆ నీటిని వడగట్టి, దీనికి కొద్దిగా తేనె కలిపి తాగితే మంచిది. అదే విధంగా అల్లం ముక్కలను బాగా ఎండబెట్టి చూర్ణంలా చేసుకుని, దానికి కాస్త జీలకర్ర, పంచదార కలిపి తీసుకుంటే దగ్గు తగ్గుతుంది.