గుప్పెడు గుండెను సురక్షితంగా వుంచే వేరుశెనగలు

Posted: 08/28/2015 03:05 PM IST

ప్రస్తుత పోటీ ప్రపంచంలో ఉరుకుల పరుగుల జీవితాన్ని గడుపుతున్న ప్రతిఒక్కరు తమ ఆరోగ్య విషయమై అంతగా కేర్ తీసుకోవడం లేదు. ఆఫీసు, ఇంటి కార్యకలాపాలు నిర్వహించుకోవడంలోనే సమయం గడిచిపోతుండటంతో.. ఇతర వ్యవహారాలపై ముఖ్యంగా తమ ఆరోగ్యంపై దృష్టి సారించడం కష్టతరమవుతోంది. పైగా.. టెన్షన్ తో కూడిన పనులు ఎక్కువగా వుండటం వల్ల తీవ్ర మానసిక ఆవేదనకు గురవుతున్నారు. ఫలితం.. గుండె సంబంధిత సమస్యలు తలెత్తుతాయి. ఈ సమస్యలు వచ్చినప్పుడు వెంటనే జాగ్రత్తలు తీసుకుంటే మంచిది. అలాకాకుండా ఆలస్యం చేస్తే మాత్రం ప్రాణాలకే ప్రమాదం వుంటుంది.

గుండె సంబంధిత సమస్యల నుంచి దూరంగా వుండాలంటే ప్రతిరోజూ గుప్పెడు వేరుశెనగలు తీసుకుంటే చాలని ఆరోగ్య నిపుణులు అంటున్నారు. వాటిని రెగ్యులర్ తీసుకుంటే.. గుండెకు సంబంధించిన సమస్యలు ఏవీ దరిచేరవని వారంటున్నారు. అంతేకాకుండా రోజూ కొద్ది పరిమాణంలో వేరుశెనగలు తినడం వలన కేన్సర్, డెమెన్షియా, డయాబెటిస్, వచ్చే అవకాశాలు గణనీయంగా తగ్గుతాయని, తద్వారా ఎలాంటి అనారోగ్యాలు రావని చెబుతున్నారు. రోజూ వేరుశెనగలు తినడం ద్వారా దీర్ఘాయువు పొందేందుకు వీలు ఉంటుందని ఆరోగ్య నిపుణులు చెబుతున్నారు. వేరుశెనగల వలన నాడీ క్షీణత సంబంధిత వ్యాధులు, ఉబ్బసం వంటి శ్వాసకోశ వ్యాధులతో బాధపడే అవకాశాలు తగ్గుముఖం పడతాయని స్పష్టం చేస్తున్నారు.