ఆరోగ్యమైన జీవితానికి పోషకాహారమే మేలు

Posted: 07/30/2015 12:28 PM IST

ప్రస్తుత యుగంలో చిన్నా, పెద్దా అని తేడా లేకుండా ప్రతిఒక్కరు ఫాస్ట్ ఫుడ్‌కు అలవాటు పడిపోయారు. ఫ్రైడ్ రైస్, పిజ్జా, బర్గర్ వంటి వాటినే రెగ్యులర్ డైట్ లో తీసుకుంటున్నారు. మరికొందరు మాత్రం డైటింగ్ ప్లాన్స్ అంటూ అసలు ఆహారమే తీసుకోవడం మానేస్తారు. ఇలా చేయడం వల్ల శరీరానికి పౌష్టికాహారం అందక రకరకాల అనారోగ్యాల బారిన పడతారు. ఇక ఫాస్ట్ పుడ్ లను నిత్యం తీసుకుంటే.. డయాబెటిస్, స్థూలకాయం వంటి వ్యాధులకు గురై.. రకరకాల ఆరోగ్య సమస్యల్ని ఎదుర్కోవాల్సి వస్తుంది. ఆ వ్యాధులు తీవ్రతరమైతే.. ప్రాణాలు పోయే ప్రమాదం కూడా వుంటుంది.

అలాకాకుండా నిత్యం ఆరోగ్యంగా వుండాలంటే పోషకాహారం రెగ్యులర్ గా తీసుకోవాలని ఆరోగ్య నిపుణులు సూచిస్తున్నారు. శరీరానికి మేలు చేసే పిండి పదార్థాలను ఎక్కువగా, ప్రోటీన్లను కాస్త తక్కువగా వున్న ఆహారం తీసుకుంటే.. ఆరోగ్యంగా వుండటంతోపాటు ఎక్కువకాలం జీవించవచ్చునని శాస్త్రజ్ఞులు అంటున్నారు. ఈ మేరకు తాజాగా ఆస్ట్రేలియాలోని సిడ్నీ వర్సిటీ వైద్య నిపుణులు ఓ ఎలుకలపై జరిపిన పరిశోధనలో ఈ విషయం తేలింది. ప్రతి రోజు మనం తీసుకునే ఆహారంలో మొత్తం కెలరీల్లో 40 శాతం తగ్గించుకుంటే ఎలాంటి ఫలితం వస్తుందో, పిండి పదార్థాలను ఎక్కువగా, ప్రొటీన్లను కాస్త తక్కువగా తీసుకున్నప్పుడు కూడా దాదాపు అలాంటి ఫలితమే దక్కుతుందని ఆ అధ్యాయనంలో తేలింది. కాబట్టి.. పిండిపదార్థాలు ఎక్కువగాను, ప్రోటీన్లను కాస్త తక్కువ మోతాదులోనూ వుండే ఆహారాన్ని తీసుకుంటే.. ఆరోగ్యాన్ని రక్షించుకోవచ్చని నిపుణులు చెబుతున్నారు.

ఆరోగ్యకరమైన ఆహారాల్లో తాజాగా వుండే కూరగాయలు, ఆకుకూరలు చేర్చుకోవాల్సి వుంటుంది. వాటిల్లో శరీరానికి కావలసిన పోషకాలు, మినరల్స్, ప్రొటీన్లు, పిండి పదార్థాలు, ఇతర ఔషధగుణాలు దాగివుంటాయి. అవి రకరకాల వ్యాధుల నుంచి దూరంగా వుంచి, ఆరోగ్యంగా వుండేలా చేస్తాయి. అందుకే.. వాటిని రెగ్యులర్ డైట్ లో చేర్చుకోండని నిపుణులు సలహా ఇస్తున్నారు.