సౌందర్యం ఒక ప్రకృతి సహజం. దానిని ఎంత అందంగా మలుచుకుంటే అంతే ఆరోగ్యంగా వుండొచ్చు. సమయానుకూలంగా పోషక విలువల గల ఆహార పదార్థాలను సేవించడం వల్ల మానవులు ఆరోగ్యంగానే కాకుండా.. అందంగా కూడా వుంటారు. విటమిన్స్, న్యూట్రీషియన్స్, ప్రొటీనులు వంటి పోషక విలువలు ఆరోగ్యంగా వుంచడంతోపాటు.. చర్మం నిర్జీవంగా మారడానికి కారకాలయ్యే డెడ్ స్కిన్ సెల్స్ తో పోరాడి ప్రకాశవంతమైన చర్మాన్ని ప్రసాదిస్తాయి. తాజాగా జరిపిన పరిశోధనల్లో శాస్త్రజ్ఞులు పై విధంగానే పేర్కొన్నారు. కాబట్టి సరైన సమయానికి పోషక విలువలు ఎక్కువగా వుండే ఆహార పదార్థాలు తీసుకోవడం ఎంతో ఉత్తమం!

అయితే కొన్ని ఆహార పదార్థాల వల్ల చర్మం సౌందర్యం దెబ్బతినే అవకాశముంది. అటువంటి ఆహార పదార్థాలు సేవించడం వల్ల ప్రకాశవంతమైన చర్మం ఒక్కసారిగా పాలిపోతుంది. పొడిగా మారడం తయారవుతుంది. త్వరగా వయసు మందగించినట్లుగా అనిపిస్తుంది. చర్మంలో వుండే తేమ పదార్థాన్ని పూర్తిగా తొలగించి, నిర్జీవంగా మార్చేందుకు ప్రేరేపిస్తాయి. చర్మం మీద పూర్తిగా వ్యతిరేక భావాలను ఏర్పడేలా చేస్తాయి. అంతేకాకుండా కురుల అందాన్ని కూడా అవి నాశనం చేస్తాయి. జుట్టు రాలిపోవడం, తెల్లగా మారిపోవడం వంటి లక్షణాలు కూడా కనిపిస్తాయి. కాబట్టి వాటి నుంచి ఎంత దూరంగా వుంటే అంతే మంచిది. ఆ ఆహారపదార్థాలు ఏంటో మనం కూడా ఒకసారి తెలుసుకుందాం...

చర్మ సౌందర్యానికి హాని కలిగించే ఆహార పదార్థాలు :

1. గ్లుసిమిక్ ఫుడ్స్... పాస్తా, వైట్ బ్రెడ్, కేక్స్, పాస్టియోస్ వంటి ఆహార పదార్థాలు గ్లుసిమిక్ ఫుడ్స్ కిందకు వస్తాయి. ఇవి నిత్యం సేవించడం వల్ల చర్మం మీద మొటిమలు ఏర్పడుతాయి. అంతేకాకుండా కంటి కింద నల్లటి చారలు, మరకలు కూడా ఏర్పడుతాయి. దాంతో చర్మం మంటగా అగుపిస్తుంది. కాబట్టి వీటికి బదులు చిరుధాన్యాలతో తయారుచేసిన ఆహారాలను తీసుకోవడం ఎంతో శ్రేయస్కరం.

2. ఆర్టిఫిషియల్ ఫుడ్స్... సాధారణంగా ప్రాసెస్ట్ ఫుడ్ (తయారుచేసిన ఆహారాలు) లో కొన్ని కృత్రిమ రంగులు కలిగి వుంటాయి. ఇవి ఆర్టిఫిషియల్ ప్రిజర్వేటివ్స్ (కృత్రిమ సంరక్షక), ఫ్లేవరింగ్స్ (రుచికి)కి సంబంధించిన అనేక న్యూట్రీషినల్ వ్యాల్యూస్ లేదా ప్రొటీనులు కలిగి వుంటాయి. ఇవి సాధారణ ఆహార పదార్థాలలో వుండే ప్రొటీనులు, విటమిన్లకు వ్యతిరేకంగా పనిచేస్తాయి. పైగా ఇవి తీసుకున్నప్పుడు కడుపులో నొప్పిగా కూడా అనిపిస్తుంది. శరీరానికి అందాల్సిన వ్యాధి నిరోదక శక్తి ఈ ఆర్టిఫిషియల్ పదార్థాల వల్ల దెబ్బతినే అవకాశముంటుంది. వీటిలాగే పంచదారతో తయారుచేసిన కొన్ని ఆర్టిఫిషియల్ స్వీట్ పదార్థాలను తీసుకుంటే.. కొవ్వు అధికంగా పెరగడంతోపాటు శరీరానికి అవసరమయ్యే వ్యాధి నిరోధక శక్తిని తగ్గిస్తుంది. ఫలితంగా చర్మంపై మొటిమలు, చారలు ఏర్పడుతాయి. కాబట్టి ఈ విధంగా తయారుచేసే ఆర్టిషిషియల్ పదార్థాలను సేవించడం అంత మంచివి కావు.

3. ఉప్పు... సహజంగా అన్ని ఆహార పదార్థాలలో ఉప్పును ఉపయోగించడం జరుగుతుంది. అయితే మోతాదుకు మించి దీనిని సేవిస్తే.. చాలా ప్రమాదాలు ఎదురవుతాయి. కొంతమంది డైటింగ్ లో కూడా ఉప్పును ఎక్కువగా తీసుకుంటారు. అలా చేస్తే గుండెకు సంబంధించి జబ్బులు వస్తాయి. కళ్లు, ముఖం ఉబ్బుగా వున్నట్లు చేస్తుంది. కాబట్టి అన్ని ఆహారాల్లో ఉప్పుశాతం తగ్గించుకుంటే మంచిది.

4. ఆల్కాహాల్... ప్రస్తుతకాలంలో అమ్మాయిలు, అబ్బాయిలు అంటూ తేడా ఏమీ లేకుండా ప్రతి ఒక్కరు దీనిని సేవిస్తుంటారు. రేవ్ పార్టీలు, రెస్టారెంట్ లు, ఫంక్షన్లు అంటూ ప్రతిచోట వీటిని తీసుకుంటారు. అయితే ఇందులో వుండే డ్యూరియాటిక్ లక్షణాలు చర్మానికి ఎంతో హాని కలిగిస్తాయి. చర్మాన్ని హైడ్రేట్ చేసి.. రఫ్ గా, పొడిగా మార్చేటట్లు చేస్తుంది. త్వరగా వయసు మందగిస్తున్నట్లు అనిపిస్తుంది.

5. కాఫీ... ఉదయాన్నే లేవగానే ప్రతిఒక్కరికి బెడ్ కాఫీ తీసుకోవడం అలవాటు. అయితే ఇటువంటి కేఫినేటెడ్ డ్రింక్స్ రోజుకు 2 నుంచి 3 సార్లు తీసుకుంటే.. చర్మం డల్ గా, నిర్జీవంగా తయారవ్వడానికి కారణం అవుతుంది. ఎందుకంటే.. కాఫీ తీసుకోవడం వల్ల ఒత్తిడికి సంబంధించిన హార్మోనులు (కార్టిసోల్) విడుదల అవుతాయి. అప్పుడు ఇవి తమ ప్రభావాన్ని చర్మం మీద చూపించి, చర్మాన్ని నిర్జీవంగా చేస్తాయి.

6. ఫాస్ట్ ఫుడ్... వీటిని సేవించడం వల్ల శరీరంలో జరిగే రక్తప్రసరణను తగ్గించడానికి కారణం అవుతుంది. రక్తం గడ్డకట్టించి, హాని కలిగించే బ్యాక్టీరియాలను విడుదల అవడానికి దోహదపడుతాయి. అలాగే చర్మం మొటిమలు, మచ్చలు కూడా ఏర్పడుతాయి.
ఈ విధంగా కొన్ని ఆహారాలు చర్మ సౌందర్యాన్ని హాని కలిగించడంతోపాటు.. ఆరోగ్యాన్ని కూడా పాడుచేస్తాయి.