సంచలన ట్వీట్ చేసిన గుత్తా జ్వాల.. అంతలోనే..

Posted: 08/07/2018 01:36 PM IST

బ్యాడ్మింటన్ స్టార్ క్రీడాకారిణి గుత్తా జ్వాల సంచలన ట్వీట్ చేసి.. అది కాస్తా వైరల్ కాగానే వెంటనే దానిని డిలీట్ చేసింది. అయితే ఈ ట్వీట్ లో అమె ఏకంగా తెలంగాణ ప్రభుత్వంపై విమర్శలు చేసింది. తెలంగాణ సర్కారు తనకు ఇచ్చిన హామీలను నాలుగేళ్లు పూర్తికావస్తున్నా నిలబెట్టుకోలేకపోయిందని ఆరోపించింది. ఆమె ఇలా ట్వీట్ చేయగానే అది ఒక్కసారిగా వైరల్ అయింది. అన్ని చానళ్లలోనూ ప్రముఖంగా రావడంతో ఆ తర్వాత కాసేపటికే జ్వాల ఆ ట్వీట్ ను తొలగించింది.

ఇంతకీ అమె ఆ ట్వీట్ లో ఏం పేర్కోనిందంటే.. బ్యాడ్మింటన్ అకాడమీ ఏర్పాటుకు తనకు స్థలం ఇస్తామని తెలంగాణ ప్రభుత్వం హామీ ఇచ్చిందని.. దీంతో పాటు ఇంటి స్థలం కోసం కూడా ప్రభుత్వ స్థలం కేటాయిస్తామని తెలంగాణ ప్రభుత్వం తనకు హామి ఇచ్చి నాలుగేళ్లు అయ్యిందని అన్నారు. అయినా, ఇప్పటి వరకు ఈ విషయంలో ఎటువంటి పురోగతి లేదని జ్వాల ఆవేదన వ్యక్తం చేసింది. ఇచ్చిన మాటను ప్రభుత్వం నిలబెట్టుకోలేకపోయిందని ఈ డబుల్స్ స్టార్ విమర్శించింది.

తెలంగాణ అథ్లెట్లకు ప్రోత్సాహకంగా అప్పట్లో ప్లాట్లు ప్రకటించిందని, అందులో భాగంగానే తనకూ నజరానాలు ప్రకటించిందని పేర్కొన్న జ్వాల ఇప్పటి వరకు అది అందకపోవడం బాధగా ఉందని పేర్కొంది. అయితే ఈ ట్వీట్ ను తన అకౌంట్లో మాత్రమే పోస్టు చేయకుండా ఏకంగా ముఖ్యమంత్రి కార్యాలయంతో పాటు ఐటీ, పట్టణాభివృద్ది శాఖ మంత్రి కే తారాక రామారావుకు కూడా ట్యాగ్ చేసింది. అయితే, ఆ తర్వాత కాసేపటికే ఆ ట్వీట్‌ను డిలీట్ చేయడం చర్చనీయాంశమైంది.