భారత జోడి శుభారంభం.. మిక్స్ డ్ ఈవెంట్ లో స్వర్ణం..

Posted: 10/24/2017 08:37 PM IST

ఐఎస్‌ఎస్‌ఎఫ్‌ ప్రపంచకప్‌ పోటీల్లో భారత్‌ శుభారంభం చేసింది. 10మీటర్ల పిస్తల్‌ మిక్స్ డ్‌ ఈవెంట్‌లో జీతూ రాయ్‌-హీనా సిద్ధూ జోడీ స్వర్ణ పతకం కైవసం చేసుకుంది. ఫ్రాన్స్‌ రజత పతకాన్ని కైవసం చేసుకోగా.. చైనా కాంస్యంతో సరిపెట్టుకుంది. ఐఎస్‌ఎస్‌ఎఫ్‌ ప్రపంచకప్‌ పోటీలు తొలిసారి భారత్‌ వేదికగా జరుగుతున్నాయి. ఫైనల్‌ పోటీల కోసం జరిగిన క్వాలిఫైయింగ్‌లో అగ్రస్థానంలో నిలిచిన జీతూ జోడీ ఆ తర్వాత జరిగిన ఫైనల్‌లోనూ అదే ప్రదర్శన కొనసాగించారు.

దీంతో ఫైనల్లో జీతూ-సిద్ధూ జోడీ 483.4 పాయింట్లతో అగ్రస్థానంలో నిలిచింది. 481.2 పాయింట్లతో ఫ్రాన్స్‌, 418.2 పాయింట్లతో చైనా ద్వితీయ, తృతీయ స్థానాల్లో నిలిచాయి. ‘సొంతగడ్డపై స్వర్ణపతకం సాధించడం ఎంతో సంతోషంగా ఉంది. స్వర్ణం గెలిచినప్పటికీ ఇప్పటికీ మాపై ఎంతో ఒత్తిడి ఉంది. సొంత అభిమానులు మధ్య మాపై అంచనాలు పెరిగాయి. దీంతో గతకొద్ది రోజుల నుంచి ఇద్దరం కలిసి ప్రాక్టీస్‌లో పాల్గొన్నాం ’ అని పతకాలు స్వీకరించిన అనంతరం జీతూ-సిద్ధూ జోడీ తెలిపారు.