‘‘బాయ్’’పై జ్వాల, అశ్విని నమ్మకం కోల్పోయారట!

Posted: 12/06/2014 12:44 PM IST

Gutta jwala ashwini ponnappa indian star shutler comments badminton association of india special coach

భారత స్టార్ డబుల్స్ షట్లర్స్’గా పేరుగాంచిన గుత్తాజ్వాల, అశ్విని పొన్నప్పలు ‘‘బాయ్’’ మీద బాగానే ఫైర్ అయ్యారు. బాయ్’పై నమ్మకం కోల్పోయామని చెబుతున్న ఈ జంట.. ఇకమీదట ఆ బాయ్’పై ఆధారపడదలుచుకోలేదని కరాఖండీగా వెల్లడిస్తున్నారు. గతకొన్నాళ్ల నుంచి ఆ బాయ్’పై తమ మనసులో దాచుకున్న పూర్తి అక్కసును ఈ జంట ఒక్కసారిగా బయటపెట్టేసింది. ఇంతకీ ఆ ‘బాయ్’ ఎవరు అని ఆలోచిస్తున్నారా..? బాయ్ అంటే బ్యాడ్మింటన్ అసోసియేషన్ ఆఫ్ ఇండియా (BAI).

‘బాయ్’ మునుపటిలా కాకుండా ఈసారి డబుల్స్’పై వివక్ష చూపుతోందంటూ ఆ ఇద్దరు క్రీడాకారిణులు మండిపడుతున్నారు. ఒలంపిక్స్’కి సమయం దగ్గరపడుతున్నా.. ఇంతవరకు డబుల్స్’కు స్పెషలిస్ట్ కోచ్’ను నియమించలేదని ఆగ్రహం వ్యక్తం చేశారు. తమకు కోచ్’ని నియమిస్తారనే నమ్మకంతో ఇన్నాళ్లవరకు వున్నామని.. కానీ బాయ్ ప్రదర్శించిన నిర్లక్ష్యం పట్ల ఆ సంస్థపై పూర్తిగా నమ్మకం కోల్పోయామని.. ఇకనుంచి శిక్షణకోసం అన్ని సదుపాయాలున్న ఓ ఆసియా దేశానికి వెళ్లనున్నామని స్పష్టం చేశారు.

ప్రపంచ ఛాంపియన్’షిప్’లో కాంస్య పతకం, కామన్వెల్త్ క్రీడల్లో రజత పతకాన్ని సాధించిన ఈ జోడీ.. గతకొన్నాళ్ల నుంచి జరుగుతున్న టోర్నీల్లో మాత్రం అంతగా ప్రతిభ కనబరచలేకపోయింది. వరుసగా పరాజయాల పాలవుతూనే వుంది. సరైన కోచ్’ను నిర్వహించకపోవడంతోనే ఈ జోడీ ఓడిపోయారంటూ ఆరోపణలు వచ్చిన సందర్భాలూ వున్నాయి. ఇప్పుడు అంతర్జాతీయ క్రీడలు సమీపిస్తున్న కోచ్’ను నియమించకపోవడంతో ఈ జంటతోబాటు మరికొందరు మండిపడ్డారు.