ఇంగ్లాండ్ తో నాలుగో టెస్టు నుంచి బుమ్రా ఔట్.. రీజన్ పర్సనల్..

Posted: 02/27/2021 07:27 PM IST

ఇంగ్లండ్‌తో జరుగనున్న కీలకమైన నాలుగో టెస్టుకు టీమిండియా స్టార్‌ బౌలర్‌ జస్‌ప్రీత్‌ బుమ్రా దూరమయ్యాడు. వ్యక్తిగత కారణాల దృష్ట్యా ఈ ఫాస్ట్‌బౌలర్‌ అహ్మదాబాద్‌ టెస్టు నుంచి తప్పుకొన్నాడు. తనకు విశ్రాంతి కావాల్సిందిగా బుమ్రా భారత క్రికెట్‌ నియంత్రణ మండలిని కోరడంతో బోర్టు ఇందుకు అనుమతించింది. ఈ నేపథ్యంలో అతడు చివరి టెస్టుకు అందుబాటులో ఉండడని బీసీసీఐ ఒక ప్రకటనలో తెలిపింది. అదే విధంగా బుమ్రా స్థానంలో జట్టులోకి మరే ఇతర ఆటగాడిని తీసుకోవడం లేదని స్పష్టం చేసింది. కాగా నాలుగు టెస్టు మ్యాచ్‌ల సిరీస్‌లో భాగంగా టీమిండియా ఇప్పటికే 2-1తో సిరీస్‌లో ముందంజలో ఉన్న సంగతి తెలిసిందే.

అదే విధంగా అహ్మదాబాద్‌లోని మొతేరా స్టేడియంలో జరిగిన మూడో టెస్టు విజయంతో ఐసీసీ వరల్డ్‌ టెస్టు చాంపియన్‌షిప్‌ పాయింట్ల పట్టికలో అగ్రస్థానంలో నిలిచింది. ఇక ఆఖరి టెస్టులో విజయం సాధించినా లేదంటే డ్రా చేసుకున్నా భారత్‌ ఫైనల్‌లో అడుగుపెట్టేందుకు మార్గం సుగమమవుతుంది. ఈ నేపథ్యంలో బుమ్రా జట్టుకు దూరం కావడం కాస్త ఆందోళన కలిగించే అంశం. అయితే, మొతేరా పిచ్‌పై జరిగిన గత మ్యాచ్‌లో స్పిన్నర్ల హవా కొనసాగడం.. తదుపరి మ్యాచ్‌ కూడా అక్కడే జరగనుండటంతో బుమ్రా లేని లోటు పెద్దగా కనిపించకపోవచ్చనే విశ్లేషణలు వినిపిస్తున్నాయి.