బాక్సింగ్ డే టెస్టు: రెండు వికెట్ల దూరంలో టీమిండియా..

Posted: 12/29/2018 05:34 PM IST

India vs australia highlights 3rd test day 4 cummins frustrate india as australia finish on 258 8

ఆస్ట్రేలియాతో మెల్‌బోర్న్ వేదికగా జరుగుతున్న మూడో టెస్టు మ్యాచులో భారత్ జట్టు విజాయానికి మరో రెండు వికెట్ల దూరంలో నిలిచింది. నాలుగో రోజే అసీస్ ను కంగారుపెట్టించి చాపచుట్టేయ్యాలని భావించిన టీమిండియా ఆశలపై టెయిల్ ఎండర్స్ నీళ్లు చల్లారు. మరీ ముఖ్యంగా ఆస్ట్రేలియా బౌల‌ర్ క‌మ్మిన్స్‌ నీళ్లు చ‌ల్లాడు. బంతితో స‌త్తా చాటి రెండో ఇన్నింగ్స్ లో భార‌త్‌ను స్వ‌ల్ప స్కోరుకే ప‌రిమితం చేసిన క‌మ్మిన్స్ తాజాగా బ్యాటుతోనూ మెరిశాడు.

అజేయ అర్ధ‌శ‌త‌కం సాధించిన‌ క‌మ్మిన్స్ (61 బ్యాటింగ్‌) భార‌త్ విజ‌యాన్ని మ‌రో రోజుకు వాయిదా వేశాడు. దీంతో మెల్‌బోర్న్‌లో జ‌రుగుతున్న బాక్సింగ్ డే టెస్ట్‌లో నాలుగో రోజు ఆట ముగిసే స‌మ‌యానికి ఆస్ట్రేలియా 85 ఓవ‌ర్ల‌లో 8 వికెట్లు కోల్పోయి 258 ప‌రుగులు చేసింది. షాన్ మార్ష్ (44), హెడ్ (34), ఖ‌వాజా (33) చెప్పుకొద‌గ్గ ప‌రుగులు చేశారు. క‌మ్మిన్స్ (61 బ్యాటింగ్‌), లియాన్ (6 బ్యాటింగ్‌) క్రీజులో ఉన్నారు.

భార‌త బౌల‌ర్ల‌లో జ‌డేజా మూడు వికెట్లు ద‌క్కించుకున్నాడు. బుమ్రా, ష‌మీ రెండేసి, ఇషాంత్ ఒక వికెట్ ప‌డ‌గొట్టారు. అంతుకు ముందు 54/5 తో నాలుగో రోజు బ్యాటింగ్ కొన‌సాగించిన టీమిండియా 106/8 వ‌ద్ద ఇన్నింగ్స్‌ను డిక్లేర్ చేసింది. మయాంక్ అగ‌ర్వాల్ (42), పంత్ (33) కీల‌క ప‌రుగులు చేశారు. ఆస్ట్రేలియా విజ‌యానికి మరో 141 ప‌రుగులు అవ‌స‌రం. మ‌రో రెండు వికెట్లు ప‌డితే విజ‌యం భార‌త్ వశం కావడంతో పాటు విరాట్ సేన రికార్డులను కూడా సొంతం చేసుకుంటుంది.