ట్రేడాఫ్ కింద ఢిల్లీ డేర్ డెవిల్స్ కు ధావన్..

Posted: 10/31/2018 05:53 PM IST

టీమిండియా ఓపెనర్‌ శిఖర్ ధావన్‌ వచ్చే ఏడాది ఇండియన్‌ ప్రీమియర్‌ లీగ్‌లో ఢిల్లీ డేర్‌డెవిల్స్‌కు ఆడటం ఖాయమే! పదకొండేళ్ల తర్వాత అతడు ఢిల్లీకి ఆడుతుండటం విశేషం. గతేడాది వేలంలో ఆర్టీఎం విధానంలో ధావన్ ను రూ.5.2 కోట్లకు సన్ రైజర్స్‌ తీసుకుంది. ఎక్కువ ధరకు తనను రీటెయిన్‌ చేసుకోలేదని గబ్బర్‌ సన్ రైజర్స్‌ కోచ్‌తో వాగ్వాదానికి దిగినట్టు ఇటీవల వార్తలు వచ్చాయి. ఈ నేపథ్యంలో అతడిని ట్రేడాఫ్‌ విధానంలో తీసుకొనేందుకు పలు జట్టు ముందకువచ్చాయి.

వీటిలో ముంబయి ఇండియన్స్‌, కింగ్స్‌ ఎలెవన్‌ పంజాబ్‌ జట్లు కూడా వున్నాయి. అయితే అందివచ్చిన అవకాశంతో తమ జట్టు ఫలితాన్ని తొలి బంతి నుంచే మార్చాలని భావించిందో ఏమో తెలియదు కానీ.. ఢిల్లీ డేర్‌ డెవిల్స్‌ అనూహ్యంగా ముందుకోచ్చి ధావన్ ను దక్కించుకుందని అభిజ్ఞవర్గాల సమాచారం. ధావన్ కు బదులుగా ఢిల్లీ నుంచి షాబాజ్‌ నదీమ్‌, విజయ్‌ శంకర్‌, అభిషేక్‌ వర్మను సన్ రైజర్స్ హైదరాబాద్‌ తీసుకోనుంది. ఈ విషయంలో సన్‌రైజర్స్‌‌ వ్యూహాత్మకంగా అడుగులు వేసిందని సమాచారం.

దేశవాళీ క్రికెట్‌లో మంచి పేరున్న నదీమ్‌ (రూ.3.2 కోట్లు)ను భారత స్పిన్నర్‌ కోటాలో వినియోగించుకోనుంది. ఇక ఏడాది అంతరం తర్వాత విజయ్‌ శంకర్ (రూ.3.2 కోట్లు) తిరిగి హైదరాబాద్‌కు వస్తున్నాడు. అతడు తన ఆల్‌రౌండ్‌ సేవలతో జట్టును మరింత పటిష్ఠం చేయనున్నాడు. ఇక యువ అభిషేక్‌ వర్మ (రూ.55 లక్షలు) మిడిలార్డర్‌లో ఉపయోగపడతాడు. ఈ ముగ్గురికి ఇవ్వాల్సిన మొత్తం రూ.6.95 కోట్లు. ధావన్‌ విలువ రూ.5.2 కోట్లు. మిగిలిన డబ్బును దిల్లీకి హైదరాబాద్‌ చెల్లించాల్సి ఉంటుంది.