భుమి, బూమ్రాలను జట్టులోకి రప్పించాం: విండీస్ కోచ్

Posted: 10/26/2018 06:19 PM IST

వెస్టిండీస్ జట్టు మెరుగ్గా ఆడటంతోనే ఫాస్ట్ బౌలర్లు జస్‌ప్రీత్ బుమ్రా, భువనేశ్వర్ కుమార్‌లను భారత జట్టులోకి మళ్లీ సెలక్టర్లు ఎంపిక చేశారని వెస్టిండీస్ కోచ్ స్టువర్ట్ లా అభిప్రాయపడ్డాడు. విశాఖపట్నం వేదికగా గత బుధవారం జరిగిన రెండో వన్డేలో విరాట్ కోహ్లి (157 నాటౌట్: 129 బంతుల్లో 13x4, 4x6) అజేయ శతకం బాదడంతో తొలుత బ్యాటింగ్ చేసిన భారత్ జట్టు నిర్ణీత 50 ఓవర్లలో 6 వికెట్ల నష్టానికి 321 పరుగులు చేయగా.. లక్ష్య ఛేదనలో షై హోప్ (123 నాటౌట్: 134 బంతుల్లో 10x4, 3x6) సెంచరీ సాధించడంతో.. వెస్టిండీస్ కూడా సరిగ్గా 50 ఓవర్లలో 321/7తో నిలిచింది. దీంతో.. మ్యాచ్ టైగా ముగిసింది.

తొలి రెండు వన్డేలకి బుమ్రా, భువీలకు విశ్రాంతినిచ్చిన సెలక్టర్లు వారి స్థానంలో ఉమేశ్ యాదవ్, మహ్మద్ షమీలను ఎంపిక చేశారు. కానీ.. ఈ ఇద్దరు పేసర్లూ రెండు వన్డేల్లోనూ చెప్పుకోదగ్గ స్థాయిలో రాణించలేకపోయారు. దీంతో.. చివరి మూడు వన్డేల కోసం గురువారం 15 మందితో కూడిన జట్టుని ప్రకటించిన సెలక్టర్లు.. షమీపై వేటు వేసి.. బుమ్రా, భువీలని మళ్లీ జట్టులోకి ఎంపిక చేశారు.

‘జస్‌ప్రీత్ బుమ్రా, భువనేశ్వర్‌లను మళ్లీ భారత జట్టులోకి ఎంపిక చేయడానికి కారణం సిరీస్‌లో వెస్టిండీస్ జట్టు బాగా ఆడుతుండటమేనని నాకు అనిపిస్తోంది. లేకపోతే..తొలి రెండు వన్డేలకి విశ్రాంతినిచ్చిన వారిని మళ్లీ ఎందుకు పిలిపిస్తున్నట్లు..? వన్డేల్లో అపార అనుభవం ఉన్న బుమ్రా, భువీలను మళ్లీ రప్పించిన ఘనత విండీస్‌కే చెందుతుంది’ అని స్టువర్ట్ లా ధీమా వ్యక్తం చేశాడు.