అప్ఘన్-పాక్ మ్యాచులో రచ్చ.. 3 క్రికెటర్లకు ఫైన్..

Posted: 09/22/2018 07:58 PM IST

ఆసియా కప్‌లో భాగంగా పాకిస్థాన్, అఫ్గానిస్థాన్ మధ్య శుక్రవారం జరిగిన మ్యాచ్‌‌ కొత్త గొడవలకి తెరలేపింది. ఇరు జట్ల ఆటగాళ్లు ఆధిపత్యం కోసం ప్రయత్నించగా.. హద్దులుమీరిన ముగ్గురు క్రికెటర్లకి జరిమానా కూడా పడింది. ఈ మ్యాచ్‌లో తొలుత బ్యాటింగ్ చేసిన అఫ్గానిస్థాన్ జట్టు నిర్ణీత 50 ఓవర్లలో 6 వికెట్ల నష్టానికి 257 పరుగులు చేయగా.. పాక్ 49.3 ఓవర్లలోనే 258/7తో గెలిచి ఊపిరి పీల్చుకుంది. చివరి ఓవర్‌లో 10 పరుగులు అవసరమవగా.. షోయబ్ మాలిక్ వరుసగా 6, 4 బాది పాక్‌ని గెలిపించాడు.

మ్యాచ్‌ మధ్యలో క్రమశిక్షణ తప్పిన పాకిస్థాన్ బౌలర్ హసన్ అలీ, అఫ్గానిస్థాన్‌ క్రికెటర్లు అస్గర్, రషీద్‌ ఖాన్‌కి మ్యాచ్ ఫీజులో 15 శాతం కోత విధిస్తూ ఐసీసీ నిర్ణయం తీసుకుంది.ఈ జరిమానాతో పాటు ముగ్గురు క్రికెటర్ల ఖాతాలో ఓ డీమెరిట్ పాయింట్ కూడా చేర్చింది.

తొలుత అఫ్గానిస్థాన్‌ బ్యాట్స్‌మెన్‌పైకి ఉద్దేశపూర్వంగా బంతి విసిరి హసన్ అలీ తప్పుచేయగా.. ఆ తర్వాత కొద్దిసేపటికే హసన్‌ అలీ భుజాన్ని రాసుకుంటూ వెళ్లి అఫ్గాన్ కెప్టెన్ అస్గర్ క్రమశిక్షణ తప్పాడు. ఇక చివర్లో రషీద్ ఖాన్.. ఆసిఫ్ అలీని ఔట్ చేసి మితిమీరి సంబరాలు చేసుకుని శిక్షకి బలయ్యాడు.