తుది టెస్టుకు మహమ్మద్ షమీకి పిలుపు..

Posted: 03/22/2017 09:48 PM IST

ఆస్ట్రేలియాతో తుది సమరంలో భారత జట్టులోకి ఫాస్ట్ బౌలర్ మహమ్మద్ షమీ రావడం ఇంచుమించు ఖరారైంది. బోర్డర్ - గవాస్కర్ సిరీస్ వశం కావాలంటే చివరిదైన నాలుగో టెస్ట్ మ్యాచ్ గెలిచి తీరాలి. ధర్మశాల పిచ్ పేసర్లకు అనుకూలిస్తుందన్న క్యూరేటర్ సునీల్ చౌహాన్ అంచనాతో షమీని సిద్ధం చేశారు. గత ఏడాది ఇంగ్లండ్‌తో మూడో టెస్ట్ సందర్భంగా మోకాలి గాయంతో వైదొలగిన షమీ మొన్న విజయ్ హరారే ట్రోఫీలో బెంగాల్ తరపున ఆడాడు. 26 పరుగులిచ్చి 4 వికెట్లు తీశాడు. ఇప్పటికే భారత్‌ జట్టుతో పాటు షమీ కూడా ధర్మశాల చేరుకున్నాడు.

ప్రస్తుతం ఇద్దరు పేసర్లు ఇషాంత్ శర్మ, ఉమేష్ యాదవ్ చెమటోడుస్తున్నారు. భువనేశ్వర్ కుమార్ ఉన్నా తుది జట్టులో స్థానం దక్కలేదు. పేసర్ల దాడిని ముమ్మరం చేయాలన్న యోచనతో షమీని తీసుకోవాలని నిర్ణయానికొచ్చినట్లు సమాచారం. వన్డే మ్యాచ్. మోకాలి గాయం నుంచి కొద్ది రోజుల కిందటే కోలుకున్న షమీ టెస్ట్‌లో ఎక్కువ ఓవర్లు బౌలింగ్ చేయగలడా అనే సందేహం ఉన్నా ఆడగలడనే నమ్మకాన్ని వ్యక్తం చేస్తున్నాయి బిసిసిఐ వర్గాలు.. ‘ధర్మశాలలో అందమైన ఉదయం’ అంటూ షమీ ట్వీట్ చేయడంతో ఆయన అక్కడికి చేరుకున్నాడన్న సంకేతాలు వెలువడ్డాయి. అయితే ఇటీవల రోహిత్ శర్మ కూడా బెంగళూరు టెస్టెకు ముందు అక్కడకు వచ్చిన విషయాన్ని కూడా గుర్తు చేసుకోవాలని అంటున్నారు క్రీడా విశ్లేషకులు.