భజ్జీ శుభాకాంక్షలు ఇబ్బందులను తెసుకోచ్చింది..

Posted: 07/09/2016 05:51 PM IST

టీమిండియా పరిమిత ఓవర్ల క్రికెట్ కెప్టెన్ మహేంద్ర సింగ్ ధోనీ అభిమానులు సీనియర్ స్పిన్నర్ హర్భజన్ సింగ్ ను టార్గెట్ చేశారు. ట్విట్టర్ వేదికగా ధోనీ అభిమానులు భజ్జీపై మాటల యుద్ధంతో దాడి చేశారు. ఇంతకీ ధోనీ అభిమానులు భజ్జీపై ఆగ్రహం వ్యక్తం చేయడానికి.. టీమిండియా మాజీ కెప్టెన్ సౌరబ్ గంగూలీ బర్త్ డే పరోక్షంగా కారణమైంది. దాదాకు బర్త్ డే విషెస్ తెలుపుతూ భజ్జీ ట్విట్టర్ను అనుసంధానం చేసుకున్నాడు. అంతటితో అగకుండా తన అభిప్రాయాన్ని కూడా వ్యక్తం చేశాడు. అదేంటి అంటారా..?

టీమిండియా అత్యుత్తమ కెప్టెన్గా గంగూలీని భజ్జీ అభివర్ణించాడు. ఈ వ్యాఖ్యలే ధోనీ అభిమానులకు కోపం తెప్పించాయి. భజ్జీని విమర్శిస్తూ ధోనీ అభిమానులు ట్వీట్ చేశారు. ధోనీ భజ్జీని వాటర్ బాయ్ చేశాడని, జట్టులో లేకుండా చేసినందుకు నైరాశ్యంలో ఉన్నాడంటూ.. ధోనీ భజ్జీని పక్కనబెట్టి అశ్విన్కు ప్రాధాన్యం ఇచ్చినందుకు ఈర్ష్య పడుతున్నాడంటూ.. దాదా బెస్ట్ కెప్టెన్ అయితే, ధోనీ ఎవరు? అంటూ.. భజ్జీ ఇలా ట్వీట్ చేసినందుకు టీమిండియాకు మళ్లీ ఎంపికకాడంటూ.. భారత క్రికెట్లో రమేష్ పవార్ అత్యుత్తమ ఆఫ్ స్పిన్నర్ అంటూ... నెటిజెన్లు సెటైర్లు వేశారు.

దాదా తన నాయకత్వంలో భజ్జీ, యువరాజ్, సెహ్వాగ్, జహీర్ వంటి ఆటగాళ్లను ప్రోత్సహించాడు. భజ్జీకి కూడా దాదాతో ప్రత్యేక అనుబంధముంది. టీమిండియా కెప్టెన్లుగా ధోనీ, గంగూలీ ఇద్దరూ విజయవంతయ్యారు.. జట్టును ఉన్నత స్థాయికి తీసుకెళ్లి ఎన్నో విజయాలు అందించారు.. అయితే ఈ ఇద్దరిలో ఎవరు గొప్ప అనే విషయంలో అభిప్రాయాలు వేరుగా ఉన్నాయి. అయితే ఎవరి అభిప్రాయాలు వారికి. ఒకరు అభిప్రాయాలను వ్యక్తం చేసిన తరువాత.. వాటిని ప్రభావితం చేసేలా మరో క్రికెటర్ అభిమానులు అయనను టార్గెట్ చేస్తూ విమర్శలకు దిగడం సహేతుకం కాదని, ఇది క్రీడాస్పూర్తి భంగం కలిగిస్తుందని కూడా క్రీడా విశ్లేషకులు అభిప్రాయపడుతున్నారు.

మనోహర్