అనిల్ కుంబ్లేకు బ్రిటీష్ ఎయిర్ వేస్ క్షమాపణలు

Posted: 07/08/2016 08:27 PM IST

భారత క్రికెట్ జట్టు కొత్త కోచ్గా బాధ్యతలు స్వీకరించిన అనంతరం తొలి విదేశీ పర్యటనకు వెళ్లిన అనిల్ కుంబ్లేకు బ్రిటీష్ ఎయిర్ వేస్ క్షమాపణలు కోరింది. "జరిగిన తప్పుకు క్షమించండి. మీ బ్యాగ్స్ సెయింట్ కిట్స్ కు చేరలేదు. ఇవి గాత్విక్ లో ఉండిపోయాయి. మీ సామాన్లు మీకు సాధ్యమైనంత త్వరగా అందిస్తాం" అని ట్వీట్ చేసింది. విషయం అర్థమైందా.. లేదా..? అనీల్ కుంబ్లే లగేజీని బ్రిటీష్ ఎయిర్వేస్ లండన్లోని గాట్విక్ ఎయిర్పోర్ట్లోనే మరచిపోవడంతో కుంబ్లేకు ఇబ్బందికర పరిస్థితి తలెత్తింది. భారత క్రికెట్ జట్టు ముంబైలో బయల్దేరి లండన్ మీదుగా సెయింట్ కిట్స్లో దిగింది.

ప్రధాన కోచ్ అనిల్ కుంబ్లే లగేజీ విషయంలో బ్రిటీష్ ఎయిర్వేస్ నిర్లక్ష్యంగా వ్యవహరించడంతో అతని దుస్తులతో పాటు తదితర వస్తువులన్నీ లండన్ ఎయిర్ పోర్ట్లోనే ఉండిపోయాయి. అయితే కుంబ్లే మాత్రం జట్టుతో కలిసి విండీస్ కు చేరుకున్నాడు. ఈ మేరకు తర్వాత తన లగేజీ కోసం కుంబ్లే ఫిర్యాదుపై సదరు ఎయిర్వేస్ స్పందించింది. తాము చేసిన తప్పిదానికి క్షమించాలని, సాధ్యమైనంత త్వరగా కుంబ్లే లగేజీని అందజేస్తామని ట్విట్టర్ లో పేర్కొంది. గతంలో ఓసారి మాస్టర్ బ్లాస్టర్ సచిన్ టెండూల్కర్కు సైతం ఈ తరహా అనుభవమే ఎదురైంది. అప్పట్లో బ్రిటీష్ ఎయిర్వేస్ తీరును సచిన తప్పుబట్టాడు. ఆ ఎయిర్వేస్ ' డోంట్ కేర్' విధానం నచ్చలేదని మాస్టర్ మండిపడ్డాడు.

మనోహర్