తొలి టెస్టులో లంకపై భారత్ 192 పరుగుల అధిక్యం

Posted: 08/13/2015 06:38 PM IST

Spinners cap india s day of batting domination

శ్రీలంకతో గాలే వేదికగా జరుగుతున్న తొలి టెస్ట్ మ్యాచ్ లో భారత్ విజయం దిశగా ఉరకలు వేస్తుంది. ఈ మ్యాచ్‌లో టీమిండియా ఓపెనర్ శిఖర్ ధావన్, కెప్టెన్ విరాట్ కోహ్లీ ఇద్దరు అద్భుత శతకాలను నమోదు చేయడంతో కోహ్లీ సేన పటిష్ట స్థితిలో నిలిచి.. మ్యాచ్ పై భారత్ పట్టుబిగించింది. శ్రీలంకపై తొలి ఇన్నింగ్స్ లో 192 పరుగుల అధిక్యతను నమోదు చేసిన టీమిండియా 375 పరుగులకు అలౌట్ అయ్యింది. రెండు వికెట్ల నష్టానికి 128 పరుగుల ఓవర్ నైట్ స్కోరుతో రెండో రోజు ఆటను ప్రారంభించిన భారత్... ఏమాత్రం పట్టుసడలించకుండా లంక బౌలర్లను ఉతికి అరేసింది. రెండో రోజున 247 పరుగులను జోడించిన టీమిండియా 8 వికెట్లను కోల్పోయింది.

లంక బౌలర్ల గతి తప్పిన బంతులను బౌండరీలకు తరలిస్తూ.. ధీటుగా బ్యాటింగ్ కొనసాగించింది. ఈ క్రమంలో శిఖర్ ధావన్ 178 బంతుల్లో పది ఫోర్ల సాయంతో 100 పరుగులు చేశాడు. ఇది ధావన్‌కు నాలుగో సెంచరీ కావడం గమనార్హం. మరోవైపు విరాట్ కోహ్లీ కూడా తన కెరీర్ లో 11వ టెస్టు సెంచరీని నమోదు చేసుకున్నారు. వీరి తరువాత వృద్దిమాన్ సాహ కూడా అద్భుతంగా రాణించి అర్థశతకాన్ని నమోగు చేశాడు. సాహా చివరిలో 60 పరుగులతో స్కోరు బోర్డును పరుగులెత్తించగా, మిగిలిన బ్యాట్స్ మెన్లు ఎవరూ అంతగా రాణించలేదు.

లంక బౌలర్లలో కౌశల్ 5 వికెట్లు దక్కించుకోగా, ప్రదీప్ 3 వికెట్లు, ప్రసాద్, మాథ్యూస్ చెరో విక్కెట్ పడగోట్టారు. తొలి ఇన్నింగ్స్ లో 183 పరుగులు చేసిన శ్రీలంక.. రెండో ఇన్నింగ్స్ లోనూ భారత స్పిన్ మాయాజాలనికి తలవంచింది. ఒక్క పరుగుకే రెండు వికెట్లను నష్టపోయింది. ఓపెనర్లు ఇద్దరు డౌకట్ అయ్యారు. కరుణ్ రత్నేను అశ్విన్, సిల్వను అమిత్ మిశ్రా క్లీన్ బౌల్డ్ చేశారు. రెండో రోజు ఆట ముగిసే సమాయానికి రెండు వికెట్ల నష్టానికి ఐదు పరుగుల స్కోరును లంక నమోదు చేసింది.

జి మనోహర్