ఢిల్లీపై విజయంతో మళ్లీ అగ్రస్థానంలోకి రాయల్స్

Posted: 05/04/2015 11:18 AM IST

ఐపీఎల్-8 సీజన్ మొదలైన తొలిరోజుల్లో రాజస్థాన్ జట్టు అద్భుతమైన ఆటతీరుతో వరుసగా 5 విజయాలను నమోదు చేసుకుంది. ఆస్ట్రేలియాకు సంబంధించిన ధీటైన ఆటగాళ్లతోపాటు ప్రతిభగల ఇండియన్ ప్లేయర్స్ ఈ జట్టులో వుండటంతో ఈ జట్టు బాగానే ప్రదర్శించగలిగింది. అయితే.. ఆ తర్వాత ఏమైందో తెలీదుగానీ.. ఏవిధంగా మొదటి 5 విజయాలు నమోదు చేసుకుందో.. అదేవిధంగా 5 పరాజయాలను చవిచూసింది. ఈ దెబ్బతో ఈ జట్టు పనైపోయిందని అనుకున్నారు కానీ.. ఆదివారం ముంబైలో జరిగిన మ్యాచ్ లో తన సత్తా చాటింది. ఢిల్లీ మీద తన ప్రతాపం చూపించి.. ఈ జట్టు మళ్లీ తన అగ్రస్థానాన్ని పొందింది.

ముంబై స్టేడియంలో జరిగిన మ్యాచులో ఢిల్లీ డేర్ డెవిల్స్ జట్టుపై రాజస్థాన్ 14 పరుగుల తేడాతో విజయం సాధించింది. తొలుత టాస్ గెలిచిన ఢిల్లీ జట్టు.. ప్రత్యర్థి ఆటగాళ్లను బ్యాటింగ్ కి ఆహ్వానించింది. దీంతో మొదట బ్యాటింగ్ చేసిన రాయల్స్ జట్టు.. నిర్ణీత 20 ఓవర్లలో 2 వికెట్లు కోల్పోయి 189 పరుగులు చేసింది. ఓపెనర్ గా వచ్చిన అజింక్యా రహానే (91) చివరిదాకా ఢిల్లీ బౌలర్లపై విరుచుకుపడ్డాడు. కెప్టెన్ వాట్సన్ (21) ఔటైన తర్వాత బ్యాటింగ్ చేసేందుకు వచ్చిన కరుణ్ నాయర్ (61) కూడా బ్యాట్ ఝుళిపించాడు. రహానే, నాయర్ వీరవిహారంతో రాయల్స్ స్కోరు పరుగులు పెట్టింది. ఢిల్లీ బౌలర్లు వీరిని నిలువరించడంలో పూర్తిగా విఫలమయ్యారు.

ఇక 190 పరుగుల లక్ష్యంతో బరిలోకి దిగిన ఢిల్లీ జట్టు.. 175 పరుగులు చేసి పరాజయం పాలయ్యింది. డుమీని (56) కెప్టెన్ ఇన్నింగ్స్ ఆడినా.. అత్యధిక ఖరీదైన ఆటగాడు యువరాజ్ (22) మాత్రం చాలా దారుణమైన ప్రదర్శనతో వెనుదిరిగాడు. ఆ తర్వాత వచ్చిన బ్యాట్స్ మెన్లందరూ స్వల్ప స్కోరుకే వెనుదిరిగారు. రాయల్స్ బౌలర్లు వరుసగా వికెట్లు తీయడంతో ఢిల్లీ జట్టు కుదేలయ్యింది. రాయల్స్ బౌలర్ల ధాటికి ఢిల్లీ జట్టు 20 ఓవర్లలో 7 వికెట్లు కోల్పోయి 175 పరుగులు మాత్రమే చేయగలిగింది. ఈ విజయంలో రాయల్స్ పాయింట్ల పట్టికలో అగ్రస్థానంలోకెళ్లింది.

AS