సుప్రీంకోర్టు తీర్పు పట్ల హర్షం వ్యక్తం చేసిన ప్రముఖు

Posted: 01/23/2015 12:21 PM IST

ఇండియన్ ప్రీమియర్ లీగ్ (ఐపీఎల్) స్పాట్ ఫిక్సింగ్ పై సర్వోన్నత న్యాయస్థానం సుప్రీంకోర్టు వెలువరించిన తీర్పును పలువురు క్రికెట్ దిగ్గజాలు, పూర్వ బీసిసిఐ సభ్యులు, క్రికెటర్లు స్వాగతించారు. ఐపీఎల్, బిసిసిఐ నిబంధనల్లో మార్పలు, చేర్పులు అత్యున్నత న్యాయస్థానం ఇచ్చిన తీర్పుపై వారు హర్షం వ్యక్తం చేశారు. సుప్రీం తీర్పు శుభసూచకమని మాజీ క్రికెట్ ఆటగాడు కీర్త ఆజాద్ పేర్కొన్నారు. క్రీడల్లో రాజకీయ నాయకులకు స్థానం ఉండకూడదని ఆయన అభిప్రాయపడ్డారు. ఆటలను మెరుగుపరిచేందుకు ఇంకా అనేకం చేయాల్సి ఉందని తెలిపారు. ఐపీఎల్‌లోనే కాదు.. చాలా బోర్డుల్లో అవినీతి ఉందని వాటిన్నింటిపై కూడా సుప్రీం దృష్టిసారించాలని కీర్తి ఆజాద్ అభిప్రాయపడ్డారు.

సుప్రీంకోర్టు తీర్పు చరిత్రాత్మకమైందని బీసీసీఐ మాజీ అధ్యక్షుడు ఏసీ ముత్తయ్య అన్నారు. శ్రీనివాసన్ తాను తప్పించుకునేందుకు నిబంధనలనే మార్చివేశాడని ఆయన ఆరోపించారు. చెన్నై జట్టులో తన వాటాను వదులుకున్నా శ్రీనివాసన్ బీసీసీఐ ఎన్నికలకు అనర్హుడుగానే ఉంటాడని.. ఈ మేరకు సుప్రీం తీర్పును వెలువరించిడంపై ఆయన హర్షం వ్యక్తం చేశారు. ఐసిసి పగ్గాలను చేపట్టాలని ఉవ్విళూరుతున్న శ్రీనివాసన్ కు ఇక అన్ని దారులు మూసుకుపోయనట్లేనన్నారు. సుప్రీం కోర్టు తీర్పును బీసీసీఐ స్వాగతిస్తోందని బిసిసిఐ కార్యదర్శి సంజయ్ పటేల్ అన్నారు. కోర్టు ఆదేశాల ప్రకారం వార్షిక సర్వసభ్య సమావేశాన్ని నిర్వహించి, ఆఫీస్ బేరర్లను ఎన్నుకుంటామని తెలిపారు. కోర్టు నియమించిన త్రిసభ్య కమిటీకీ సంపూర్ణ సహకారమందిస్తామని చెప్పారు.

బీసీసీఐని ప్రజాసంస్థగా సుప్రీం కోర్టు పేర్కొంటూ మంచి తీర్పునిచ్చిందని కేంద్ర మాజీ మంత్రి, బీసీసీఐ మాజీ అధ్యక్షుడు శరద్ పవార్ అభిప్రాయపడ్డారు. శ్రీనివాసన్‌ను తప్పించినందుకు ఆయన సంతోషం వ్యక్తం చేశారు. ఎన్నికల్లో తాను పోటీ చేసే విషయమై ఇంకా ఏ నిర్ణయం తీసుకోలేదని చెప్పారు. క్రికెట్‌తో సంబంధమున్న అందరూ ఈ తీర్పు నుంచి పాఠం నేర్చుకుంటారని వ్యాఖ్యానించారు. క్రికెట్‌ను ప్రేమించే తనకు ఈ పరిణామం చాలా బాధను కలిగించిందని భిషన్ సింగ్ బేడి అన్నారు. ఆటను గాడిన పెట్టేందుకు అత్యున్నత న్యాయస్థానం సుప్రీం కోర్టు కలుగజేసుకోవాల్సి రావడం సిగ్గుచేటని వ్యాఖ్యానించారు. ఇప్పటికైనా బీసీసీఐను సమాచార హక్కు చట్ట పరిధిలోకి తీసుకురావాలని బేడి అభిప్రాయపడ్డారు.

జి. మనోహర్