టీమిండియా ఆటగాళ్లపై సచిన్ సంచలన వ్యాఖ్యలు!

Posted: 09/04/2014 07:12 PM IST

(Image source from: sachin tendulkar comments on indian cricket team players)

భారత్ క్రికెట్ దిగ్గజం మాస్టర్ బ్లాస్టర్ సచిన్ టెండూల్కర్ ప్రస్తుతం టీమిండియా జట్టుపై కొన్ని సంచలన వ్యాఖ్యలు సంధించాడు. తొలుత ఇంగ్లాండ్ వన్డే సిరీస్ ను గెలుచుకున్న ఇండియా జట్టుకు శుభాకాంక్షలు తెలిపిన సచిన్.. ఆ తర్వాత ఒక్కొక్కటిగా లోపాలు బయటపెడుతూ అందుకు తగిన సూచనలను పేర్కొన్నాడు. ప్రస్తుత జట్టులో వున్న ఆటగాళ్లు బాగానే ప్రదర్శిస్తున్నారంటూనే.. మళ్లీ ప్లేట్ ఫిరాయించి వారికి కొన్ని సలహాలు ఇస్తున్నాడు. ఇంతకీ సచిన్ ఇండియా జట్టును పొగిడాడో లేక పరోక్షంగా అవమానపరిచాడో అర్థంకాని రీతిలో మాటలు సంధించాడనే చెప్పుకోవాలి.

ఆల్ రౌండ్ సామర్థ్యం దృష్ట్యా ‘‘టైటిల్’’ పోటీదారుల్లో టీమిండియా కూడా వుంటుందని.. రాబోయే వరల్డ్ కప్ లో ఖచ్చితంగా భారత్ రాణిస్తుందన్న నమ్మకాన్ని వ్యక్తం చేశాడు. అయితే ప్రస్తుత జట్టు సమతూకంతో, దుర్భేద్యంగా వుందని తన అభిప్రాయాన్ని తెలిపాడు. బ్యాటింగ్ విభాగంలో వున్న ఆటగాళ్లు బాగానే ప్రదర్శిస్తున్నారు కానీ.. కుడి, ఎడమల సమ్మేళనం వుంటే ఇండియాకు పరుగుల పంట పండుతుందని సూచనలిస్తున్నాడు. రైట్ - లెఫ్ట్ కాంబినేషన్ క్రీజులో వుండే అవతలి జట్టు బౌలర్లకు కష్టమని తెలిపాడు. ఇక బౌలింగ్ విభాగంలో పేస్, స్పిన్ కలయికతో చక్కగా ఇండియా జట్టు రాణిస్తోందని తెలిపాడు. ఆటగాళ్లు తమ ప్రతిభను మరింతగా ప్రదర్శించాలని.. అందుకు తగ్గట్టు వారు నిత్యం శ్రమిస్తే లాభం దక్కుతుందని పేర్కొన్నాడు.

జట్టులో వున్న ఆటగాళ్లు ప్రస్తుతం వన్డేలో ఆడిన ఆటతీరుతో ముందుకు కొనసాగితే ప్రపంచవ్యాప్తంగా నెంబర్ వన్ స్థానంలో ఇండియా జట్టు వుంటుందని తెలిపాడు. అలాగే మహేంద్రసింగ్ ధోనీ కెప్టెన్సీ చాలా అద్భుతమని.. అతనిని అంత తక్కువ అంచనా వేయలేమని తెలిపాడు. చెన్నైలో మీడియాతో మాట్లాడిన సచిన్.. ఇండియా జట్టు గురించి పొగుడ్తూనే కొన్ని సూచనలు, సలహాలను వారికి చెప్పినట్లు తెలుస్తోంది.