సచిన్ మనసులోని అరుదైన ముత్యాలు బయటపెట్టారు

Posted: 03/03/2014 12:31 PM IST

సచిన్ టెండూల్కర్  తన మనసులోని అరుదైన ముత్యాలు బయటపెట్టారు. వెస్టిండీస్‌తో ముంబయిలో రెండో టెస్టు ముగిసిన వెంటనే తాను చేసిన వీడ్కోలు ప్రసంగం ముందుగా రాసుకున్న స్క్రిప్టు కాదనీ, అందులోని ప్రతిమాట తన హృదయం నుంచి తన్నుకొచ్చిందేనని భారత మాజీ బ్యాటింగ్ దిగ్గజం సచిన్ టెండూల్కర్ స్పష్టం చేశాడు.

అయితే, ముఖ్యులనుకున్న ప్రతి ఒక్కరి పేరును ప్రస్తావించాలని ముందుగానే అనుకున్నానని, అందు కోసం కొంత కసరత్తు చేశానని ‘నెట్‌వర్క్ 18’ గ్రూప్ ఏర్పాటు చేసిన ఓ కార్యక్రమంలో పాల్గొన్న సచిన్ తెలిపాడు. 

కోల్‌కతా మ్యాచ్ ముగిసిన తర్వాత వీడ్కోలు ప్రసంగం చేయాలని అనుకున్నట్టు చెప్పాడు. అయితే, ఆ విషయంపై నిర్ణయం తీసుకునేలోపే మ్యాచ్ ముగిసిందని అన్నాడు. కోల్‌కతా నుంచి ముంబయి వస్తున్నప్పుడు ఒంటరిగా కూర్చొని ఆలోచించుకున్నానని తెలిపాడు.

ఒక ప్రణాళికను సిద్ధం చేసుకోకపోతే, ముంబయి టెస్టు కూడా ముగుస్తుందని, ప్రపంచ వ్యాప్తంగా అంతా తాను ఏం మాట్లాడతానోనని ఆసక్తిగా ఎదురుచూస్తుండగా, తాను మాత్రం దిక్కుతోచని స్థితిలో నిలబడాల్సి వస్తుందన్న విషయం అర్థమైందన్నాడు. 

అందుకే, ముంబయి టెస్టు పూర్తయిన వెంటనే వీడ్కోలు ప్రసంగంలో ఏం చెప్పాలనే విషయంపై తర్జన భర్జన పడిన తర్వాత, ముఖ్యులైన వారిని పేరుపేరున తలచుకొని, వారికి కృతజ్ఞతలు తెలియచేయడం ఒక్కటే సరైన మార్గంగా కనిపించిందని అన్నాడు. తాను ప్రస్తావించిన పేర్లన్నీ ముందుగానే అనుకున్నవని, అయితే, ప్రసంగంలోని మిగతా అంశాలను భగవంతుడే తనతో పలికించాడని నమ్ముతున్నానని సచిన్ అన్నాడు. 

ప్రసంగం సమయంలో ఉద్వేగానికి లోనవుతానన్న ముందుగానే ఊహించినట్టు చెప్పాడు. అందుకే, సీసాతో మంచినీరు తన వద్ద ఉంచుకున్నానని అన్నాడు. అంతకు ముందు ఎన్నడూ లేనంత సుదీర్ఘమైన ప్రసంగం తనకు అదేనని తెలిపాడు. మొత్తం మీద క్రికెట్‌కు తన వీడ్కోలు ఊహించిన దానికంటే ప్రశాంతంగానూ, సాఫీగానూ జరిగిపోయిందని అన్నాడు. 

-ఆర్ఎస్