యువరాజ్ సింగ్ కి భారీ రేటు

Posted: 02/12/2014 11:22 AM IST

భారత స్టార్ బ్యాట్స్ మెన్ యువరాజ్ సింగ్ హవా ఐపీఎల్ లో కొనసాగింది. గత ఐపీఎల్ సీజన్లో పూణె వారియర్స్ జట్టు తరుపున ఆడిన యువీ, ఆ ఫ్రాంచైజీ మూత పడటంతో ఈసారి వేలంలోకి వచ్చాడు. ప్రస్తుతం ఫాంలో లేక భారత జట్టులో స్థానం కోల్పోయిన యువీకి మాత్రం నేడు జరిగిన ఐపీఎల్ సీజన్ - 7 భారీ రేటు పలికింది. మొదటి నుండి అనుకున్నట్లుగానే రాయల్ ఛాలంజర్స్ బెంగుళూరు 14 కోట్లకు దక్కించుకుంది.

దీంతో ఆ జట్టు కెప్టెన్ విరాట్ కోహ్లీ చేసిన ప్రయత్నాలు సఫలం అయ్యాయి. ఒక యువీకే కాకుండా ఇటీవల ఇంగ్లాండ్ బోర్డు ప్రక్కకు పెట్టిన కెవిన్ పీటర్సన్ కి కూడా మంచి ధరే పలికింది. పీటర్ సన్ ని 9 కోట్లకు, మురళీ విజయ్ ని 5 కోట్లకు డిల్లీడేర్ డెవిల్స్ సొంతం చేసుకోగా, సెహ్వాగ్ ని 3.2 కోట్లతో, మిచెల్ జాన్సన్ ను రూ. 6.50 కోట్లతో కింగ్స్ లెవన్ పంజాబ్, కల్లీస్ ను 5.5 కోట్లతో కోల్ కత్త నైట్ రైడర్స్ , డేవిడ్ వార్నర్ ను రూ. 5.50 కోట్లతో సన్ రైజర్స్ హైదరాబాద్ జట్లు దక్కించుకున్నాయి.

ఇక శ్రీలంక ఆటగాడు అయిన మహేళా జయ వర్ధనేను కొనుగోలు చేయడానికి ఏ ఫ్రాంఛైజీలు ఆసక్తి చూపలేదు. ఐపీఎల్ స్పాట్ ఫిక్సింగ్ వ్యవహారం ఈ వేలం పై ప్రభావం చూపుతుందని అనుకున్నా దాని ప్రభావం ఏ మాత్రం కనిపించలేదు.