మళ్లీ సానియాను మరిచిన బిబిసీ.. యాదృశ్చికం కాదంటూ నెట్ జనులు ఫైర్

Posted: 09/16/2015 10:30 PM IST

ప్రపంచ ప్రఖ్యాత వార్తా సంస్థ ‘బీబీసీ’కు టెన్నిస్ మహిళల డబుల్స్‌లో వరల్డ్ నంబర్‌వన్ ఎవరో తెలియకుండా పోదు. వరుసగా రెండు గ్రాండ్‌స్లామ్‌లు గెలవక ముందే సానియా మీర్జా నంబర్‌వన్ అయింది. అయితే ఈ రెండు టోర్నీలు గెలిచిన సమయంలో ఆ చానల్‌కు చెందిన న్యూస్, స్పోర్ట్స్ ట్విట్టర్ అకౌంట్‌లలో కనీసం సానియా పేరు కూడా ప్రస్తావించలేదు. యూఎస్ ఓపెన్ నెగ్గిన హింగిస్... హింగిస్ మళ్లీ సాధించింది... ఇలా సాగాయి ఆ చానల్ హెడింగ్స్! ట్రోఫీని ఇద్దరూ ముద్దాడుతున్న ఫొటో పెట్టి కూడా దాని కింద హింగిస్ పేరు మాత్రమే రాసింది. దీనిపై సోషల్ మీడియాలో భారతీయులు విరుచుకుపడ్డారు.

ఇది పొరపాటుగా జరిగిందా లేక కావాలనే శ్వేత జాతీయేతర క్రీడాకారిణిపై ఇంకా వివక్ష కొనసాగుతోందా అనేది హాట్ టాపిక్‌గా మారింది. ‘హింగిస్ ఒక్కతే డబుల్స్ గెలిచిందా’... ‘డబుల్స్ అంటే ఇద్దరు ఆడతారనే విషయం కూడా చెప్పాలా’... ‘హింగిస్ రెండు చేతుల్లో రెండు రాకెట్లతో ఆడిందా’... ‘ప్రపంచంలో ఒంటరిగా డబుల్స్ టైటిల్ నెగ్గిన ఏకైక క్రీడాకారిణి హింగిస్’... ఇలా ట్వీట్లతో అభిమానులు తమ ఆగ్రహాన్ని వ్యక్తం చేశారు. వింబుల్డన్ గెలిచినప్పుడు కూడా బీబీసీ ఇలాగే రాస్తే కేంద్ర మంత్రి స్మృతి ఇరానీ ‘సానియా కూడా’... అంటూ విమర్శించింది. దాంతో క్షమాపణ చెబుతూ ట్వీట్ మార్చిన బ్రిటన్ న్యూస్ ఏజెన్సీ ఇప్పుడు మళ్లీ సానియాను మర్చిపోయింది.

జి. మనోహర్