సంతోష్ లాల్ కన్నుమూత

Posted: 07/18/2013 11:28 AM IST

భారత కెప్టెన్ మహేంద్ర సింగ్ ధోని చిన్ననాటి స్నేహితుడు, రంజీ మాజీ క్రికెటర్ అయిన సంతోష్ లాలా (32) కన్నుమూశాడు. సంతోష్ లాల్ గత కొన్ని రోజుల నుండి క్లోమానికి సంబంధించిన వ్యాధితో బాధపడుతున్నాడు. ఈయనను రాంఛీలోని ఆసుపత్రిలో చేర్చినా పరిస్థితి విషమించడంతో మెరుగైన వైద్యం కోసం ధోని సహాయంతో ఈనెల 15న ఎయిర్ అంబులెన్స్‌లో ఢిల్లీకి తరలించారు. అయినా ఆయన లాభం లేక పోయింది. ఢిల్లీలోని ఓ ఆసుపత్రిలో క్లోమ వ్యాధికి చికిత్స తీసుకుంటున్న సంతోష్ లాల్ తుది శ్వాస విడిచాడు. 32 ఏళ్ల సంతోష్‌కు భార్య, మూడేళ్ల కూతురు ఉన్నారు. సంతోష్ రైల్వేలో పని చేసేవాడు. ఈయన మరణం పట్ల జార్ఖండ్ రాష్ట్ర క్రికెట్ సంఘం స్టేడియంలో సహచర ఆటగాళ్లు నివాళులు ఆర్పించారు. రాంచీలో ఉన్నప్పుడల్లా ధోని క్రమం తప్పకుండా లాల్‌ను కలిసేవాడు. మహీ కొట్టే హెలికాప్టర్ షాట్‌కు అతనే ఆద్యుడు కూడా. ఈ విషయం తెలుసుకున్న ధోని విషాదంలో మునిగిపోయాడు.