ఇదేనా ఆటతీరు..

Posted: 07/04/2013 01:15 PM IST

టీం ఇండియా జట్టు వరుస విజయాలతో దూసుకుపోవడమే కాకుండా అన్ని విభాగాల్లో రాణించి ఛాంపియన్స్ ట్రోఫీ ని చేజిక్కుకొని నెంబర్ వన్ టీమ్ అంటే ఇదే అని అనిపించుకున్నారు. అది మొన్నటి మాట. ఛాంపియన్స్ ట్రోఫీ విజయానందంలో ఎంతో ఉత్సాహాంగా ముక్కోణపు సిరీస్ లో విండీస్ గడ్డ పై అడుగు పెట్టిన మన జట్టు మొదటి మ్యాచ్ లో పోరాడి ఓడింది.  పోనీ రెండో మ్యాచ్ లో అయినా లంక పై అదరగొడతారని అందరు అనుకున్నారు. కానీ లంక సింహాల గర్జింపుకు తలవంచడమే కాకుండా, వారి ఆట తీరు చూసిన సగటు ప్రేక్షకుడికి ఈ జట్టేనా వారం క్రితం ఇంగ్లాండ్ ను ఓడించింది అనే సందేహం కలిగి ఉంటుంది.  మ్యాచ్ ఓడటం కంటే ఓడిన తీరే అందరినీ కలవర పెట్టడమే కాకుండా, విదేశీ గడ్డ పై మా తీరు ఇంతేనని మరోసారి నిరూపించుకున్నారు. శ్రీలంకతో జరిగిన మ్యాచ్ లో టీం ఇండియా వ్యూహాలన్నీ బెడిసి కొట్టాయి. బౌలింగ్ లోపాలు, ఫీల్డింగ్ తప్పిదాల మాట అటుంచితే బ్యాట్స్ మెన్ ఆట తీరే  మరీ ఆందోళన కలిగించింది. బౌలర్లు, ఫీల్డింగ్ తప్పిదాల వల్ల భారీ పరుగులు సమర్పించుకున్నా కానీ, బ్యాటింగ్ కి వచ్చే సరికి తడబడింది. భారీ లక్ష్యాన్ని ఛేదించాల్సి వచ్చినప్పుడు రన్ రేట్ ని పరిగణలోకి తీసుకోకుండా నెమ్మదిగా బ్యాటింగ్ చేయడం ఆశ్చర్యపరిచేదే. ఓవర్లు 15 దాటినా రన్ రేట్ మాత్రం 4 దాటలేదు బ్యాటింగ్ లో అదరగొడుతున్న ధావన్, విజయ్ ఆట తీరు చూస్తే... భారత్ కి విజయం పై శ్రద్ధ ఉన్నట్లే అనిపించలేదు. వికెట్లు పడుతున్నాయి, స్కోరు కదలట్లేదు... అయినా పవర్ ప్లే తీసుకోలేదు. మ్యాచ్ పూర్తిగా చేజారాక పవర్ ప్లే తీసుకున్నారు. మొత్తానికి పేవలమైన ఆట తీరుతో మ్యాచ్ చేజార్జుకున్నా అభిమాలు బాధపడరు కానీ, ఇలాంటి ఆట తీరును ఏ ప్రేక్షకుడు సహించడు. ఇప్పటికైనా పక్కా ప్రణాళికతో వచ్చే మ్యాచ్ లలోనైనా గెలవాలని ప్రతి అభిమాని కోరుకుంటున్నారు.