సఫారీల పై గెలుపు

Posted: 06/07/2013 11:04 AM IST

మొన్నటి వరకు ఐపీఎల్ లో అదరగొట్టి, మళ్ళీ వెంటనే ఛాంపియన్స్ ట్రోఫి లో పాల్గొన్న మన భారత ఆటగాళ్ళు ఏ మాత్రం అలసిపోకుండా, తన జోరు తగ్గకుండా నిన్న దక్షిణాప్రికాతో జరిగిన మ్యాచ్ లో అదరగొట్టి ఛాంపియన్స్ ట్రోఫీలో శుభారంభం చేశారు. బ్యాటింగులోనూ, బౌలింగులోనూ సమిష్టిగా రాణించి మంచి విజయాన్ని సొంతం చేసుకున్నారు. మొదట టాస్ గెలిచి ఫీల్డింగ్ ఎంచుకున్న దక్షిణాఫ్రికా బౌలర్లను ఓపెనింగ్‌ జోడీ శిఖర్‌ ధావన్‌ (114; 12 ఫోర్లు, 1 సిక్స్‌తో), రోహిత్ శర్మ (81 8 ఫోర్లు, 1 సిక్స్ )తో ధీటుగా ఎదుర్కోవడానికి తోడు చిరవర్లో రవీంద్ర జడేజా 47 నాటౌట్ అండగా నిలవడంతో భారత్ నిర్ణీయ 50 ఓవర్లలో 331 భారీ స్కోరు సాధించింది. అదే తరహాలో బౌలర్లు సైతం సమస్టిగా పోరాటంతో టీమిండియా విజయాన్ని దక్షిణాఫ్రికా అడ్డుకోలేకపోయింది. అనంతరం బ్యాటింగ్‌కు దిగిన సఫారీలను ఆదిలోనే ఉమేష్‌, భువనేశ్వర్‌ షాక్‌ ఇచ్చారు. 8 పరుగుల తేడాతో చెరో వికెట్‌ పడగొట్టిన వీరిద్దరు దక్షిణాఫ్రికాను ఇబ్బందుల్లోకి నెట్టారు. కానీ మూడు, నాలుగు స్థానాల్లో బరిలోకి దిగిన పీటర్సన్‌ (68), డివిలియర్స్‌ (70) నిలకడగా ఆడి రెండో వికెట్‌కు 124 పరుగుల భాగస్వామ్యాన్ని నమోదు చేశారు. వీరిద్దరు క్రీజ్‌లో ఉన్నంత సేపు గెలుపుపై ఆశలు పెంచుకున్న సఫారీలకు జడేజా, ఉమేష్‌ యాదవ్‌ నిరాశ కల్గించారు. 38 పరుగుల తేడాతో మూడు వికెట్లు కోల్పోయిన సపారీలకు ఆపద్భాందవుడి రూపంలో మెక్‌ లారెన్‌ (71 నాటౌట్‌) ఇన్నింగ్స్‌ను కొనసాగించినా విజయ తీరాలకు మాత్రం చేర్చలేక పోయాడు. దీంతో గ్రూపు బిలో తొలి విజయాన్ని భారత్ నమోదు చేసుకుంది. ఇక శిఖర్ ధావన్ వన్డేల్లో తొలిసెంచరీ నమోదు చేసుకోవడం మ్యాచ్ ఆఫ్ ద మ్యాచ్ అవార్డు దక్కింది. భారత బౌలర్లు భువనేశ్వర్‌ కుమార్‌, ఉమేష్‌ యాదవ్‌, ఇషాంత్‌, రవీంద్ర డేజాలు తలా రెండేసి వికెట్లు పంచుకున్నారు.