బెంగుళూరును బాదేసిన మిల్లర్

Posted: 05/07/2013 11:02 AM IST

ఇప్పటి వరకు ఐపీఎల్ లో విధ్వంసకర బ్యాట్స్ మెన్ అంటే క్రిస్ గేల్ అని టక్కున చెప్పేస్తారు. కానీ గేల్ ఒక్కడే కాదు మరొకడ్ని కూడా ఉన్నానని నిన్నరాత్రి జరిగిన మ్యాచ్ తో నిరూపించుకున్నాడు. మొన్న గేల్ చేసిన మెరుపు సెంచరీ, తుఫాన్ ని మరవకముందే ప్రేక్షకులకు మరో మెరుపు ఇన్నింగ్స్ ని అందించాడు దక్షిణాఫ్రికా బ్యాట్స్ మెన్ డేవిడ్ మిల్లర్. తన వింధ్వంసకర ఇన్నింగ్స్ తో బెంగుళూరును ఒంటిచేత్తో ఓడించి, పంజాబ్ కి మరచిపోలేని విజయాన్ని అందించాడు. కేవలం 38 బంతుల్లో (8 ఫోర్లు, 7 సిక్స్‌ల సాయంతో) 101 పరుగులు చేసి ఈ సీజన్‌లో మరో వేగవంతమైన శతకాన్ని నమోదు చేసి రికార్డు స్రుష్టించాడు. మొదట బ్యాటింగ్ చేసిన బెంగుళూరు జట్టు నిర్ణీత 20 ఓవర్లలో 190 పరుగులు చేసింది. ఓపెనర్లు ఛతేశ్వర్‌ పుజారా (51), గేల్‌ (61) అర్ధ శతకాలతో, డివిలియర్స్‌ (38), హెన్రిక్యూస్‌ (16) మెరుపు బ్యాటింగ్ తో భారీ స్కోరు సాధించింది.

బెంగళూరు నిర్థేశించిన 190 పరుగుల విజయ లక్ష్యాన్ని ఛేధించే క్రమంలో పంజాబ్‌ మొదటి నాలుగు వికెట్లను త్వరగా చేజార్చుకొని, విజయం కష్టమే అనుకుంటున్న సమయంలో ఐదో వికెట్ గా బరిలోకి దిగిన మిల్లర్ బెంగళూరు బౌలర్లను ఎడాపెడా వాయించాడు. హస్సీతో 13, సతీష్‌తో 130 పరుగుల భాగస్వామ్యాన్ని నమోదు చేసిన ఈ పంజాబ్‌ కింగ్‌ మరో రెండు ఓవర్లు మిగిలి ఉండగానే జట్టు స్కోరు 194 పరుగులకు చేర్చి పంజాబ్‌కు ఎదురులేని విజయాన్ని అందించడమే కాకుండా, మ్యాన్ ఆఫ్ ది మ్యాచ్ అవార్డును సొంతం చేసుకున్నాడు.