ముంబయి హ్యాట్రిక్ విజయం

Posted: 04/30/2013 01:08 PM IST

ముంబై ఇండియన్స్ జట్టుకు ఢిల్లీ మ్యాచ్ గుణపాఠం నేర్పినట్లు ఉంది. ఆ మ్యాచ్ లో భారీ స్కోరు చేసినా ఓటమి పాలవడంతో జీర్ణించుకోలేక పోయిన ముంబై, ఆ తరువాత వరుసగా కొల్ కత్తా, బెంగుళూరు, పంజాబ్ జట్లను చిత్తు చేసి వరుస విజయాలతో హ్యాట్రిక్ సాధించింది. నిన్న రాత్రి మొహాలీ స్టేడియంలో జరిగిన మ్యాచ్ లో పంజాబ్ పై 4 పరుగుల తేడాతో గెలుపొందింది. తొలుత బ్యాటింగ్ చేసిన ముంబయి జట్టు నిర్ణీత 20 ఓవర్లలో 174 పరుగులు చేసింది. దిలోనే సచిన్‌ వికెట్‌ను కోల్పోయిన ముంబైని స్మిత్‌ (33), కార్తిక్‌ (25) ఆదుకున్నారు. వీరిద్దరు రెండో వికెట్‌కు 32 పరుగుల భాగస్వామ్యాన్ని నమోదు చేయగా.. అనంతరం క్రీజ్‌లోకి వచ్చిన రోహిత్‌ శర్మ అజేయంగా 79 పరుగులు సాధించి స్కోరుబోర్డును పరుగులు పెట్టించాడు. అతనికి తోడు పొలార్డ్‌ (20) సైతం సహకరించడంతో పంజాబ్‌ ముందు 175 పరుగుల విజయ లక్ష్యాన్ని ఉంచింది ముంబై. అనంతరం భారీ విజయ లక్ష్యాన్ని ఛేదించేందుకు బరిలోకి దిగిన పంజాబ్‌ ఆదిలోనే తడబడి మన్‌దీప్‌సింగ్‌ 9, మార్ష్‌ 10, ఒహ్రా 1 వికెట్లను కోల్పోయి కష్టాల్లో పడింది. అనంతరం క్రీజ్‌లోకి వచ్చిన హస్సీ (34), మిల్లర్‌ (56) నిలకడగా ఆడి ఇన్నింగ్స్‌ను గాడిలో పెట్టారు. వీరు అందించిన సూర్తితో చివర్లో ఛావ్లా (12), కుమార్‌ (24) తుదికంటా పోరాడినా పంజాబ్‌కు ఓటమి తప్పలేదు. ఆఖరు బంతికి ఐదు పరుగుల చేయాల్సిన సమయంలో ప్రవీణ్‌కుమార్‌ కొట్టిన భారీ షాట్‌ను సచిన్‌ క్యాచ్‌ తీసుకోవడంతో నిర్ణీత 20 ఓవర్లలో పంజాబ్‌ 170 పరుగులు చేసి ఆలౌట్‌ అయింది.