Posted: 01/08/2013 11:16 AM IST

       భారత క్రికెట్ లో కొత్త ఒరవడికి శ్రీకారం చుట్టాడు యువ ఆటగాడు పుజారా. వన్డే ఫార్మట్‌లో మెరుపులు మెరిపించడం, తద్వారా సెలెక్టర్ల దృష్టిని ఆకర్షించి టెస్టు జట్టులో స్థానం పొందడం అనే పద్ధతిని భారత బ్యాట్స్‌ మెన్‌ పాటిస్తూ వస్తున్నారు. అయితే చేతేశ్వర్‌ పుజారా విషయంలో ఇది రివర్స్‌ అయ్యింది. టెస్టు స్పెషలిస్ట్‌ గా పేరుగాంచిన పుజారా టెస్టుల్లో ప్రతిభ నిరూపించుకుని వన్డేల్లో అడుగు పెడుతున్నాడు. ఇంగ్లండ్‌తో జరగనున్న వన్డే సిరీస్‌కు అతడ్ని ఎంపిక చేసిన సంగతి తెలిసిందే. టెస్టు క్రికెట్‌లో ప్రవేశించిన తరువాత ఐదేళ్లకుగానీ అతడికి వన్డేల్లో ఆడే అవకాశం లభించలేదు. దేశవాళీ క్రికెట్‌లో వన్డే ఫార్మట్‌లో మంచి రికార్డు కలిగిఉన్నప్పటికీ అతడికి అవకాశం తలుపు తట్టలేదు.
       ఇంకా,  ముగ్గురు సీనియర్‌ క్రీడాకారులు-సచిన్‌, సెహ్వాగ్‌, గంభీర్‌ జట్టులో ఉండటం అతడికి ప్రతిబంధకాలు కల్పించింది. వీరు ముగ్గురూ ఓపెనర్లు కావడం వల్ల సమస్య వచ్చిపడింది. విరాట్‌ కొహ్లి నెంబర్‌ త్రీ స్థానంలో రాణించడం పుజారాకు అవకాశం లభించక పోవడానికి మరో కారణం. సచిన్‌ రిటైర్‌ కావడం, వీరూ ఫామ్‌లో లేకపోవడంతో పుజారాకు అవకాశం కలిసివచ్చింది. ఛాలెంజర్‌ ట్రోఫీలో అత్యధిక పరుగులు చేసిన బ్యాట్స్‌ మన్‌గా నిలవడంతో పుజారాకు పిలుపు వచ్చింది. ఇంగ్లండ్‌తో జరిగే సిరీస్‌లో తనకు పిలుపు వస్తుందని ముందే భావించానని పుజారా అంటున్నడు.. ఏమైనా,  ఆల్ ది బెస్ట్ పుజా..

...avnk