Posted: 10/01/2012 08:17 PM IST

మళ్లీ అతడే... బంతితోనూ... బ్యాట్‌తోనూ కదం తొక్కాడు. ఫలితం ఆస్ట్రేలియా ఘన విజయం. అద్భుత ఫామ్‌లో ఉన్న షేన్ వాట్సన్ మరోసారి ఆల్‌రౌండ్ ప్రదర్శన చేశాడు. దీంతో పటిష్టమైన దక్షిణాఫ్రికా జట్టు తెల్లబోయింది. సూపర్ ఎయిట్‌లో రెండు పరాజయాలతో సెమీస్ బెర్త్‌ను క్లిష్టం చేసుకుంది.షేన్ వాట్సన్ (47 బంతుల్లో 70; 8 ఫోర్లు, 2 సిక్సర్లు; 2/29) ఆల్‌రౌండ్ ప్రదర్శనతో ఆస్ట్రేలియా టి20 ప్రపంచ కప్ సూపర్ ఎయిట్‌లో వరుసగా రెండో విజయాన్ని అందుకుంది.

ఇక్కడి ప్రేమదాస స్టేడియంలో  జరిగిన మ్యాచ్‌లో ఆసీస్ 8 వికెట్ల తేడాతో దక్షిణాఫ్రికాను చిత్తు చేసింది. ముందుగా బ్యాటింగ్ చేసిన దక్షిణాఫ్రికా 20 ఓవర్లలో 5 వికెట్ల నష్టానికి 146 పరుగులు చేసింది. పీటర్సన్ (19 బంతుల్లో 32 నాటౌట్; 6 ఫోర్లు), బెహర్దీన్ (27 బంతుల్లో 31 నాటౌట్; 2 ఫోర్లు, 1 సిక్సర్), డుమిని (25 బంతుల్లో 30; 4 ఫోర్లు) జట్టు స్కోరులో తలో చేయి వేశారు. ఆసీస్ బౌలర్లలో దోహర్తికి 3 వికెట్లు దక్కాయి. అనంతరం ఆస్ట్రేలియా 17.4 ఓవర్లలో 2 వికెట్లకు 147 పరుగులు చేసి విజయాన్నందుకుంది. వాట్సన్, మైక్ హస్సీ (37 బంతుల్లో 45 నాటౌట్; 2 ఫోర్లు, 2 సిక్సర్లు) కలిసి రెండో వికెట్‌కు 99 పరుగులు జోడించారు. వరుసగా నాలుగో మ్యాచ్‌లోనూ వాట్సన్‌కే మ్యాన్ ఆఫ్ ది మ్యాచ్ అవార్డు దక్కడం విశేషం. ఈ విజయంతో ఆసీస్ సెమీస్ చేరుకోవడం దాదాపు ఖాయమైంది. మరోవైపు రెండు ఓటములతో దక్షిణాఫ్రికా సెమీస్ అవకాశాల్ని క్లిష్టం చేసుకుంది.