Posted: 09/11/2012 03:53 PM IST

సోమవారం రాత్రి జరిగిన ప్రతిష్టాత్మక యుఎస్ ఓపెన్ 2012 టెన్నిస్ టోర్నీ పురుషుల విభాగంలో టైటిల్ విజేతగా ఆండీ ముర్రే నిలిచాడు. గత 76 యేళ్ళలో ఓ బ్రిటన్ క్రీడాకారుడు యుఎస్ ఓపెన్ టైటిల్‌ను కైవసం చేసుకోవడం ఇదే తొలిసారి కావడం గమనార్హం.

న్యూయార్క్ ఫ్లాషింగ్ మెడోస్ స్టేడియంలో సెర్బియా ఆటగాడైన నోవాక్ జకోవిక్, ఆండీ ముర్రేల మధ్య ఫైనల్ పోరు హోరాహోరీగా సాగింది. మొత్తం ఐదు సెట్లుగా సాగిన ఈ మ్యాచ్‌లో ఆండీ ముర్రే తన ప్రత్యర్థి జకోవిచ్‌పై 7-6, 7-5, 2-6, 3-6, 6-2 తేడాతో విజయకేతనం ఎగురవేశాడు.వీరిరువురి మధ్య ఈ పోటీ చివరి వరకు ఉత్కంఠ భరితంగా సాగింది. మొదటి రెండు సెట్లలో ఆండీ ఆధిక్యత ప్రదర్శించగా, తర్వాత రెండు సెట్లలో జకోవిచ్ పైచేయి సాధించాడు. దీంతో నిర్ణయాత్మకమైన ఐదో సెట్‌లో ముర్రే జోరు ముందు.. జకోవిచ్ తలవంచక తప్పలేదు. ఫలితంగా 76 యేళ్ళ తర్వాత గ్రాండ్‌శ్లామ్ టైటిల్‌ను దక్కించుకున్న తొలి బ్రిటీష్ ఆటగాడిగా ముర్రే తన పేరును చరిత్రలో తన పేరు లిఖించుకున్నాడు.