Posted: 06/30/2012 11:13 AM IST

దక్షిణాఫ్రికా కెప్టెన్ గ్రేమ్ స్మిత్ త్వరలోనే ఆ బాధ్యత నుంచి వైదొలగే సూచనలు కనిపిస్తున్నాయి. ఏ ఫార్మెట్‌లోనూ జట్టును నాయకత్వం వహించరాదని యోచిస్తున్నట్టు స్మిత్ ప్రకటించాడు. ఈ విషయాన్ని కోచ్ గారీ కిర్‌స్టెన్‌తో చర్చించిన తర్వాత తుది నిర్ణయం తీసుకుంటానని తెలిపాడు. సుమారు ఎనిమిది సంవత్సరాలు అన్ని ఫార్మెట్స్‌లోనూ దక్షిణాఫ్రికాకు కెప్టెన్‌గా వ్యవహరించిన స్మిత్ 2010లో టి-20 ఫార్మెట్ నాయకత్వం నుంచి వైదొలిగాడు. 2011లో వనేడే ఇంటర్నేషనల్స్‌లో కెప్టెన్సీకి కూడా గుడ్‌బై చెప్పాడు. ప్రస్తుతం టెస్టులకు మాత్రమే కెప్టెన్‌గా వ్యవహరిస్తున్న అతను త్వరలోనే ఆ బాధ్యతలను కూడా మరో ఆటగాడికి కట్టబెట్టాలని అనుకుంటున్నాడు. ఇటీవల కాలంలో ఫామ్ కోల్పోయిన స్మిత్‌పై విమర్శలు చెలరేగాయి. ప్రపంచకప్ క్వార్టర్ ఫైనల్స్ సెమీ ఫైనల్‌లో న్యూజిలాండ్ చేతిలో దక్షిణాఫ్రికా ఓటమిపాలైన తర్వాత ప్రారంభమైన స్మిత్ పతనం ఆతర్వాత కూడా కొనసాగింది. ఒకానొక దశలో జట్టులో స్థానం కూడా కష్టంగా మారింది. పరిస్థితిని గమనించిన స్మిత్ ఇకపై కెప్టెన్సీ జోలికి వెళ్లకుండా బ్యాటింగ్‌పై దృష్టి కేంద్రీకరించాలని అనుకుంటున్నట్టు చెప్పాడు. తాను తొందరపడడం లేదని, అందరినీ సంప్రదించిన తర్వాత నిర్ణయం తీసుకుంటానని తెలిపాడు.