Posted: 02/22/2012 08:50 PM IST

టీమిండియాలో రొటేషన్ పాలసీ ప్రకంపనలు సృష్టిస్తున్న నేపథ్యంలో వైస్ కెప్టెన్ సెహ్వాగ్ మరింత గందరగోళపరిచే వ్యాఖ్యలు చేశాడు. మంగళవారం శ్రీలంకతో మ్యాచ్‌కు కెప్టెన్‌గా వ్యవహరించిన సెహ్వాగ్.. ఈ మ్యాచ్‌లో భారత్ పరాజయం తరువాత మాట్లాడుతూ సీనియర్లు చురుకైన ఫీల్డర్లు కాదన్న ధోనీ వ్యాఖ్యల గురించి తనకు తెలియదన్నాడు. ఈ నెల 19న ఆస్ట్రేలియాతో మ్యాచ్ అనంతరం మీడియాతో మాట్లాడిన ధోనీ ‘సీనియర్లు ఫీల్డ్‌ లో వేగంగా కదల్లేకపోతున్నారు. ఫీల్డింగ్ ప్రమాణాలు మెరుగ్గా ఉండేందుకే రొటేషన్ పాలసీని అమలు చేస్తున్నామ’ని పేర్కొన్న సంగతి తెలిసిందే. అయితే తమతో ధోనీ యువకులకు చాన్సిచ్చేందుకే రొటేషన్‌ను అమలు పరుస్తున్నట్లు చెప్పాడని సెహ్వాగ్ అన్నాడు. కెప్టెన్ హోదాలో మీడియాతో అతనేం మాట్లాడినా, దానిపై తాము ప్రశ్నించాల్సిన అవసరం లేదన్నాడు. ఇక లంకపై మ్యాచ్‌లో ఓటమికి తనతోసహా బ్యాట్స్‌మెన్ అందరిదీ బాధ్యత అని, షాట్ల ఎంపికలో పొరపాట్ల వల్లే ఓడిపోయామని పేర్కొన్నాడు.