Posted: 01/31/2012 08:50 PM IST

ఆస్ట్రేలియా ఓపెన్ మహిళల డబుల్స్‌లో సెమీఫైనల్ దాకా వెళ్లిన హైదరాబాద్ టెన్నిస్ స్టార్ సానియా మీర్జా డబుల్స్ ర్యాంకింగ్స్‌లో టాప్ 10లో దూసుకెళ్లింది. ఏకంగా 7వ స్థానాన్ని పొందింది. సోమవారం డబ్ల్యూటీఏ విడుదల చేసిన తాజా జాబితాలో సానియా నాలుగు స్థానాలు మెరుగుపరచుకుంది. జూన్ 21 వరకు ఇలాగే టాప్-10లో కొనసాగితే సానియాకు నేరుగా లండన్ ఒలింపిక్స్ బెర్త్ ఖరారవుతుంది. కాగా సింగిల్స్‌లో మాత్రం 106 నుంచి 111కు దిగజారింది. సింగిల్స్‌లో టాప్-64 ర్యాంకర్లకు మాత్రమే ఒలింపిక్స్‌లో ఎంట్రీ లభిస్తుంది. ఇక ఆస్ట్రేలియా ఓపెన్ పురుషుల డబుల్స్‌లో విజేతగా, మిక్స్‌డ్ డబుల్స్‌లో రన్నరప్‌గా నిలిచిన లియాండర్ పేస్ (7) ర్యాంక్‌లో మార్పులేదు. రోహన్ బోపన్న డబుల్స్‌లో 11వ స్థానాన్ని నిలబెట్టుకోగా, మహేష్ భూపతి మాత్రం ఎనిమిదో స్థానం నుంచి 16వ స్థానానికి దిగజారాడు.