1.  శుక్లాం బరధరం విష్ణుం శశివర్ణమ్ చతుర్భుజమ్ 

ప్రసన్నవదనం ధ్యాయే సర్వవిఘ్నోపశాంతయే 

అగజానన పద్మార్కం గజానన మహర్నిశం 

అనేకదంతం భక్తానాం ఏకదంత ముపాస్మహే 

2. శ్రీకరా! శుభకర! దేవ! శ్రీ గణేశ !

అభయమిడి మమ్ము రక్షించి శుభము గూర్ప 

మేలుకో గౌరీ వరపుత్ర! మేలుకొనుము 

సుప్రభాతము నీకిదే శుభ గణేశ!

3. సర్వసిద్ధి ప్రదాయక ! సర్వనేత్రా !

సర్వలోకాధినాయకా ! సకల పూజ్యా !

ఆలసింపక మేలుకో అమలరూప 

సుప్రభాతము నీకిదే శుభ గణేశా !

4. తూర్పుదిశలోన భానుడు తొంగిచూడు 

దిక్కులన్నియు నీ ఖ్యాతి తెలుపుచుండె 

మేలుకొను విఘ్నరాజ మమ్మేలుకొనగ 

సుప్రభాతము నీకిదే శుభ గణేశ !

5. లేచి నిను జూడ కనులార వేచినాము 

కరుణ కురిపించి మమ్మింక కావవయ్య 

జాగుసేయక లేవయ్య జగములేల 

సుప్రభాతము నీకిదే శుభ గణేశ !

6. నిన్ను చూడగ తమిదీర కన్నులార 

భక్తవర్యులు వచ్చిరి ప్రణతులిడగ

ఆలసింపక నిదురలే ఆర్తరక్ష

సుప్రభాతము నీకిదే శుభ గణేశ !

7. సకల కార్యాలు సలిపెడి సాధుజనులు 

యజ్ఞ యాగా లొనర్చెడి విజ్ఞవరులు 

మొదట నీ పూజ సలుపక ముందుచనరు 

సుప్రభాతము నీకిదే శుభ గణేశ !

8. ఏకదంత గజాననా ! లోకనాధా !

షణ్ముఖాగ్రజా ! పార్వతీ సాదుపుత్ర !

సర్వకార్య ఫలప్రద ! సంకటహర !

సుప్రభాతము నీకిదే శుభ గణేశ !

9. లోకములనెల్ల నడిపెడి లోకరక్ష !

మాకు తల్లివి తండ్రివి మార్గమీవె 

మమ్ము బ్రోచుట భారమా మమత జూపి 

సుప్రభాతము నీకిదే శుభ గణేశ !

10. ఈతి బాధలు బాపుమా ఈశ పుత్ర !

ధైర్యమిచ్చి గుణమిచ్చి సంసార తపన నణచి 

నీదు భక్తుం దరిజేర్ప నీవె దిక్కు 

సుప్రభాతము నీకిదే శుభ గణేశ !

11. బొజ్జతో గుజ్జురూపున గజ్జె కట్టి 

భరత నాట్యాల నర్తించి పరవశించి 

పార్వతీకుల మెప్పించు భాగ్యశాలి !

సుప్రభాతము నీకిదే శుభ గణేశ !

12. అరిభయంకర ! దైత్యసంహార ! వీర !

నీదు చరణాజ్జముల చెంత నీడనిమ్ము 

శంకర కుమార ! దేవర శౌర్యమూర్తి !

సుప్రభాతము నీకిదే శుభ గణేశ !

13. సిద్ధి చిరునవ్వు వెన్నెల సిరులు గూర్ప 

బుద్ధి మనసార భక్తితో పూజ సలువ

సిద్ధి బుద్ధి ప్రదానంద శుద్ధరూప !

సుప్రభాతము నీకిదే శుభ గణేశ !

14. సకల కళలందు నిను గొల్చి సర్వజనులు 

భుక్తి శక్తిని ముక్తిని పొందుచుంద్రు 

విమల విద్యా విశారద వినుత చరిత 

సుప్రభాతము నీకిదే శుభ గణేశ !

15. నిత్యమంగళ సుచరిత్ర ! నిర్మలాంగ 

దేవ దానవ మానవ దీనబందు !

వరద మూషిక వాహన ! వక్రతుండ !

సుప్రభాతము నీకిదే శుభ గణేశ !

16. పార్వతీ పుత్ర ! గణపతీ ! పాపనాశ !

ఘోర సంసార బాధల గోడు బాప 

మేలుకోవయ్య జగతికి మేలు గూర్ప 

సుప్రభాతము నీకిదే శుభ గణేశ !

17. ఇష్టకామ్య ఫలప్రద ! ఇభకరాస్య !

ఆయురారోగ్య భాగ్యములందజేసి 

మమ్ము దరిజేర్ప మేలుకో మహిత తేజ 

సుప్రభాతము నీకిదే శుభ గణేశ !

18. అమ్మజేసిన బొమ్మగా అవతరించి 

బ్రహ్మ సృష్టికి మారుగా బ్రతికినావు 

దేవ దానవ సమరూప దివ్యతేజ !

సుప్రభాతము నీకిదే శుభ గణేశ !

19. ప్రమధ గణనాధ పదవికి పందెమిడగ 

షణ్ముఖుడు విశ్వమునుజుట్టు సాగిపోయె 

గెలిచితివి తల్లిదండ్రుల కొలిచి నీవు 

సుప్రభాతము నీకిదే శుభ గణేశ !

20. సర్వగ్రహ బాధలను దీర్ప సాహసించి 

విధికి ఎదురీత నీదుచు విక్రమించి 

నీదు భక్తుల రక్షించి నిలుపగలవు 

సుప్రభాతము నీకిదే శుభ గణేశ !

21. వాసుదేవుని నుతియించు వ్యాసగీత 

నీదు చేవ్రాత యూతచే నిర్వహింప 

విమల పంచమవేదమై వినుతిగాంచె 

సుప్రభాతము నీకిదే శుభ గణేశ !

22. పాంచభౌతిక షట్చక్ర వంక్తియందు 

ముక్తిసాధన కాధార మూలమందు 

వరలుచుందువు జీవుడు వర్ధిలంగ 

సుప్రభాతము నీకిదే శుభ గణేశ !

23. భాద్రపద శుద్ధ చవితిని ప్రజలెవండ్రు 

నింగి చూడరు చంద్రుని నింద భయము 

నింద రాకుండ చేతురు నీదు పూజ 

సుప్రభాతము నీకిదే శుభ గణేశ !

24.పాలు మీగడ వెన్నల భక్షకుండు 

చవితి వెన్నెల రోజున చంద్రునీడ 

పాలలో జూచి కృష్ణుడు భంగపడెను 

సుప్రభాతము నీకిదే శుభ గణేశ !

25. సంతనము బాసి శౌరి శమంతకమణి 

తెచ్చి యిచ్చెను తన నింద తీరిపోవ 

ఎంతవారలైన నినుగొల్వ వంతలుడుగు 

సుప్రభాతము నీకిదే శుభ గణేశ !

26. ఆత్మలింగము తెచ్చుట కభవుగిరికి 

తల్లి కోర్కెను దీర్పగ తనయుడరిగె 

నీరు దయలేక రావణు నిష్టలుడిగె 

సుప్రభాతము నీకిదే శుభ గణేశ !

27. బ్రహ్మరుద్రాది దేవతా ప్రభృతులైన 

నిన్ను తలువక సృష్టిని నిలువలేరు 

హరిహరాదులె నిను గొల్వ నరుల మెంత? 

సుప్రభాతము నీకిదే శుభ గణేశ !

28. ఎవ్వరీ సుప్రభాతము వినగ చదువ 

ఈతి బాధలు తొలగును, ఖ్యాతిగనును 

ఇహ పరమ్ముల సౌఖ్యము లీయగలవు 

సుప్రభాతము నీకిదే శుభ గణేశ !

29. శరణు సిద్ధి వినాయక ! శరణు శరణు 

శరణు విద్యా ప్రదీపక ! శరణు శరణు 

శరణు మంగళదాయక ! శరణు శరణు 

శరణు మోక్షప్రదాయక ! శరణు శరణు 

30. జయము విఘ్న వినాయక ! జయము జయము 

జయము శుభ ఫలదాయకా ! జయము జయము 

జయము కల్యాణకారకా ! జయము జయము 

జయము పరిపూర్ణ ! నీకిదే జయము జయము 

31. మంగళము పార్వతీసుత ! మంగళమ్ము 

మంగళము శారదాసుత ! మంగళమ్ము 

మంగళము లక్ష్మీసంభూత ! మంగళమ్ము 

మంగళము విశ్వ సౌభాగ్య ! మంగళమ్ము