కబాలి ఆడియో వాయిదాకు కారణాలు

Posted: 06/02/2016 09:51 AM IST

తమిళ సూపర్ స్టార్ రజనీకాంత్ హీరోగా నటిస్తున్న తాజా చిత్రం ‘కబాలి’. పా.రంజిత్ దర్శకత్వంలో రూపొందుతున్న ఈ సినిమాను భారీ బడ్జెట్ తో నిర్మిస్తున్నారు. ఇందులో గ్యాంగ్ స్టర్ గా రజనీకాంత్ నటిస్తున్నారు. ఇప్పటికే విడుదలైన ఫస్ట్ లుక్ టీజర్ కు భారీ రెస్పాన్స్ వచ్చింది. తాజాగా ఈ సినిమా పోస్ట్ ప్రొడక్షన్ కార్యక్రమాలను కూడా పూర్తిచేసుకున్నట్లుగా తెలిసింది.

మలేషియా నేపథ్యంలో జరిగే ఈ సినిమాను మలేషియా, బ్యాంకాక్, హాంగ్ కాంగ్ లో ఎక్కువభాగం చిత్రీకరించారు. ఇప్పటికే తమిళ భాషలో రజనీకాంత్ తన పాత్రకు డబ్బింగ్ చెప్పడం కేవలం 5 రోజుల్లోనే పూర్తిచేయగా.. తెలుగులో రజనీకాంత్ పాత్రకు మనో డబ్బింగ్ చెప్పారు. సంతోష్ నారాయణ్ సంగీతం అందిస్తున్న ఈ చిత్ర ఆడియోను జూన్ 10లోపు విడుదల చేయాలని అనుకున్నారు. కానీ తాజాగా సమాచారం ప్రకారం ఆడియో విడుదల జూన్ 15వరకు వాయిదా పడినట్లుగా తెలుస్తోంది.

ఆడియో విడుదలకు సరైన వేదిక లభించకపోవడం వలన వాయిదా పడే సూచనలు కనిపిస్తున్నట్లుగా తెలిసింది. త్వరలోనే అన్ని వివరాలను అధికారికంగా ప్రకటించనున్నారు. రజనీకాంత్ సరసన రాధికాఆప్టే నటించగా కీలకపాత్రలో ధన్సిక నటిస్తున్నారు. ‘కబాలి’ చిత్రాన్ని ప్రపంచ వ్యాప్తంగా జులై 1న విడుదల కానుంది.