‘హాధీరాం బాబా’గా రాబోతున్న నాగార్జున

Posted: 02/29/2016 04:27 PM IST

అక్కినేని నాగార్జున, దర్శకేంద్రుడు కె.రాఘవేంద్రరావు కాంబినేషన్లో ఇప్పటికే చాలా సినిమాలొచ్చాయి. కమర్షియల్ గ్లామర్ చిత్రాలే కాకుండా భక్తిరస చిత్రాలు కూడా వీరి కాంబినేషన్లో రూపుదిద్దుకున్నాయి. రాఘవేంద్రరావు దర్శకత్వంలో ‘అన్నమయ్య’, ‘శ్రీరామదాసు’, ‘షిర్డీసాయి’ వంటి చిత్రాలలో నాగార్జున ప్రధాన పాత్రలలో నటించారు. ఈ సినిమాలు మంచి విజయం సాధించాయి.

మళ్లీ వీరి కాంబినేషన్లో మరో భక్తిరస చిత్రం తెరకెక్కనుంది. శ్రీ వెంకటేశ్వర స్వామి భక్తుడు హథీరాం బాబా కథ ఆధారంగా ఈ సినిమాను రూపొందించనున్నారు. ఇందులో హాధీరాం బాబా పాత్రలో నాగార్జున నటించనున్నారు. ‘అన్నమయ్య’ సినిమాలో వెంకటేశ్వర స్వామి పాత్రలో నటించి, మెప్పించిన నటుడు సుమన్ ను... ఈ తాజా చిత్రంలో కూడా వెంకటేశ్వరుని పాత్రకోసం తీసుకోవాలనే ఆలోచనలో దర్శకేంద్రుడు వున్నట్లుగా తెలుస్తోంది.

ఈ చిత్రానికి ‘నమో వెంకటేశాయ’ అనే టైటిల్ ను ఖరారు చేసినట్లుగా సమాచారం. భారీ బడ్జెట్ తో రూపొందనున్న ఈ చిత్రాన్ని మహేశ్వర్ రెడ్డి నిర్మించనున్నారు. ఈ చిత్రానికి ఎం.ఎం.కీరవాణి సంగీతం అందించనున్నారు. మే నుంచి షూటింగ్ ప్రారంభం కానుంది. పూర్తి వివరాలు త్వరలోనే అధికారికంగా ప్రకటించనున్నారు.