‘వి’తో అజిత్ కొత్త సినిమా టైటిల్?

Posted: 08/11/2015 01:17 PM IST

తమిళ స్టార్ హీరో థలా అజిత్ హీరోగా ప్రముఖ దర్శకుడు శివ దర్శకత్వంలో ఓ చిత్రం తెరకెక్కుతున్న విషయం తెలిసిందే. గతంలో వీరిద్దరి కాంబినేషన్లో ‘వీరం’ (తెలుగులో వీరుడొక్కడే) అనే బ్లాక్ బస్టర్ హిట్ చిత్రం తెరకెక్కింది. ‘వీరం’ తర్వాత వస్తున్న ఈ చిత్రంపై భారీ అంచనాలే నెలకొన్నాయి.

అంతే కాకుండా అజిత్ నటించిన సినిమాలన్నీ కూడా వరుస బ్లాక్ బస్టర్ హిట్టవుతుండటంతో... ఈ సినిమాపై అంచనాలు మరింతగా పెరిగిపోయాయి. ఇది అజిత్ కు 56వ చిత్రం కావడం విశేషం. ప్రముఖ నిర్మాత ఏఎం రత్నం భారీ బడ్జెట్ తో ఈ సినిమాను నిర్మిస్తున్నాడు. ఇందులో అజిత్ సరసన శృతిహాసన్ హీరోయిన్ గా నటిస్తుంది.

అయితే ఈ చిత్రానికి ఇంకా టైటిల్ ను ఖరారు చేయలేదు. కానీ ఈ సినిమాకు పలు రకాల టైటిల్స్ అనుకుంటున్నట్లుగా గతకొద్ది రోజులుగా సోషల్ మీడియాలో తెగ హల్చల్ చేస్తుంది. అయితే తాజా సమాచారం ప్రకారం ఈ చిత్ర టైటిల్ మొదటి అక్షరం ‘వి’ అని వుండేట్లుగా చిత్ర యూనిట్ ప్లాన్ చేస్తున్నట్లుగా తెలిసింది. ఈ చిత్ర టైటిల్ ను ఆగష్టు 15న ప్రకటించనున్నారని తెలిసింది. త్వరలోనే అన్ని వివరాలను అధికారికంగా ప్రకటించనున్నారు.