మహేష్ బాబు ‘శ్రీమంతుడు’ సెన్సార్ డేట్

Posted: 07/22/2015 06:33 PM IST

‘మిర్చి’ ఫేం కొరటాల శివ దర్శకత్వంలో తెరకెక్కిన తాజా చిత్రం ‘శ్రీమంతుడు’. సూపర్ స్టార్ మహేష్ బాబు, శృతిహాసన్ హీరోహీరోయిన్లుగా నటించిన ఈ చిత్రాన్ని మైత్రి మూవీమేకర్స్‌, ఎం.బి. ఎంటర్‌టైన్‌మెంట్‌ ప్రై.లి. బ్యానర్స్‌పై నిర్మాతలు నవీన్‌ యెర్నేని, వై. రవిశంకర్‌, మోహన్‌ సంయుక్తంగా నిర్మించారు.

దేవిశ్రీప్రసాద్ సంగీతం అందించిన ఈ చిత్ర ఆడియో ఇటీవలే విడుదలై మంచి హిట్ టాక్ ను సొంతం చేసుకుంది. అలాగే ఈ చిత్ర థియేటర్ ట్రైలర్ యూట్యూబ్ లో రికార్డులను క్రియేట్ చేస్తుంది. ఫ్యామిలీ, లవ్ యాక్షన్ ఎంటర్ టైనర్ గా రూపొందిన ఈ చిత్రంపై భారీ అంచనాలు నెలకొన్నాయి.

ఈ చిత్ర ఫస్ట్ కాపీ సిద్ధమయినట్లుగా తెలిసింది. తాజా సమాచారం ప్రకారం ఈ చిత్రాన్ని జులై 31న సెన్సార్ కోసం పంపించనున్నట్లుగా తెలిసింది. ఈలోపు పోస్ట్ ప్రొడక్షన్ కార్యక్రమాలను పూర్తి చేయనున్నారు. ప్రస్తుతం పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి.

ఈ చిత్రాన్ని ప్రపంచ వ్యాప్తంగా భారీ ఎత్తున ఆగష్టు 7వ తేదిన విడుదల చేయనున్నారు. జగపతిబాబు, సుకన్య, రాజేంద్ర ప్రసాద్, రాహుల్ రవీంద్రన్, పూర్ణ ముఖ్య పాత్రలలో నటించారు. మరి ఈ చిత్రం ఎలాంటి విజయం సాధించనుందో త్వరలోనే తెలియనుంది.