చిరు 150వ సినిమా నుంచి పూరీ తప్పుకున్నాడా?

Posted: 06/25/2015 11:06 AM IST

Puri jagannadh quits chiranjeevi 150th film

మెగా అభిమానుల్లో రోజురోజుకి ఉత్కంఠ పెరిగిపోతుంది. తమ అభిమాన నటుడు మెగాస్టార్ చిరంజీవి నటించబోయే 150వ చిత్రం విషయంలో గతకొద్ది కాలంగా ఎలాంటి క్లారిటీ లేదు. ఇటీవలే ఈ ప్రాజెక్టుకు పూరీ జగన్నాధ్ దర్శకత్వం వహించబోతున్నాడని ప్రకటించడంతో అభిమానులు కాస్త ఆనందపడ్డారు. కానీ మళ్లీ మెగా అభిమానుల్లో టెన్షన్ మొదలయ్యింది.

రాంచరణ్ తన సొంత బ్యానర్ పై తన తండ్రి మెగాస్టార్ చిరంజీవి 150వ చిత్రాన్ని పూరీ జగన్నాథ్ దర్శకత్వంలో నిర్మించనున్నాడు. ఈ విషయాన్ని ఇటీవలే అధికారికంగా ప్రకటించారు. ఈ సినిమాకు పూరీ ‘ఆటోజానీ’ అనే టైటిల్ ను కూడా ఖరారు చేసాడు. ‘ఆటోజానీ’కి సంబంధించిన ఫస్ట్ హాఫ్ కథను ఇటీవలే పూర్తి చేసి చిరుకి వినిపించడం, చిరు చాలా ఎక్సయిట్ మెంట్ ఫీలవడం జరిగిపోయాయని పూరీ చెప్పుకొచ్చాడు. ప్రస్తుతం సెకండ్ హాఫ్ ను మరింత అద్భుతంగా సిద్ధం చేసే పనిలో పడ్డాడు.

video courtesy: Aditya Telugu & Hindi Movies

ఇదంతా బాగానే వుంది.. ఇక ఆగష్టులో ఈ ప్రాజెక్టు సెట్స్ పైకి వెళ్లడం ఖాయమని అనుకున్న మెగా అభిమానులకు మళ్లీ ఓ గందరగోళం ఏర్పడింది. చిరంజీవి 150వ సినిమాకు దర్శకుడు మారే అవకాశం వున్నట్లుగా ప్రస్తుతం తెలుగు ఫిల్మ్ ఇండస్ట్రీలో వార్తలు వినిపిస్తున్నాయి. అందుకు కారణాలు కూడా బలంగానే వున్నట్లుగా కనిపిస్తున్నాయి.

చిరంజీవి 150వ సినిమా కోసం దర్శకుడు వి.వి.వినాయక్ తెగ ప్రయత్నాలు చేసారు. కానీ వినాయక్ కు అవకాశం చేజారిపోయింది. కానీ మళ్లీ చిరంజీవి 150వ సినిమా అవకాశం వినాయక్ కే దక్కేట్లుగా వుందని వార్తలు వినిపిస్తున్నాయి. ప్రస్తుతం చిరు కోసం వినాయక్ ప్రముఖ రచయిత చిన్నికృష్ణతో కలిసి ఓ పవర్ ఫుల్ కథను సిద్ధం చేస్తున్నట్లుగా తెలిసింది.

గతంలో చిరంజీవి కోసం చిన్నికృష్ణ ‘ఇంద్ర’ వంటి అద్భుతమైన కథను అందించాడు. అలాగే వినాయక్ దర్శకత్వంలో చిరంజీవి ‘ఠాగూర్’ అనే బ్లాక్ బస్టర్ హిట్ చిత్రం తెరకెక్కింది. అందుకే చిన్నికృష్ణతో కలిసి వినాయక్ ఓ పవర్ ఫుల్ స్టోరీని సిద్ధం చేస్తున్నట్లుగా తెలిసింది. ఇక పూరీ కూడా ఈ ప్రాజెక్టు నుంచి తప్పుకోబోతున్నట్లుగా వార్తలొస్తున్నాయి. అందుకు గల కారణాలు కూడా బలంగానే వున్నట్లుగా అనిపిస్తున్నాయి.