మనోజ్ సంగీత్ వేడుకలో సూపర్ స్టార్ స్టెప్పులు

Posted: 05/02/2015 11:37 AM IST

Rajinikanth dance at manchu manoj sangeet function

కలెక్షన్ కింగ్ మంచు మోహన్ బాబు చిన్న కుమారుడు, రాకింగ్ స్టార్ హీరో మంచు మనోజ్ నిశ్చితార్థం ప్రణతితో గత నెల మార్చి 4వ తేదిన ఘనంగా జరిగిన విషయం తెలిసిందే. హైదరాబాద్ లోని పార్క్ హయత్ హోటల్లో జరిగిన ఈ వేడుకకు ఇరుకుటుంబ సభ్యుల సన్నిహితులు, బంధువులతో పాటుగా సినీ, రాజకీయ ప్రముఖులు కూడా విచ్చేసి జంటను ఆశీర్వదించారు.

మనోజ్, ప్రణతిల వివాహం మే 20న నిర్ణయించారు. మే 20వ తేదిన ఉదయం 9గంటల 10 నిమిషాలకు మనోజ్, ప్రణతిల వివాహం ఖరారు చేసారు. అదే రోజున మనోజ్ పుట్టినరోజు కూడా. కాబట్టి ఈ పెళ్లి వేడుకను మరింత గ్రాండ్ గా చేయనున్నారు. అసలే మంచు వారింట్లో జరిగే శుభకార్యం కాబట్టి భారీ రేంజులో వుంటుందనే విషయం తెలిసిందే. ఇక రాకింగ్ స్టార్ పెళ్లి అంటే ఇంకా ఏ రేంజులో వుంటుందో మీరే ఊహించేసుకోండి.

అయితే మీ ఊహలకు అందని తరహాలో మంచు లక్ష్మీ ఈ పెళ్లి ఏర్పాట్లను దగ్గరుండి మరీ చూసుకుంటున్నారు. ఇటీవలే మంచు కుటుంబమంతా కలిసి భారత ప్రధాని నరేంద్ర మోడీని కలిసి ఈ వివాహానికి ఆహ్వానించారు. అయితే ఈ పెళ్లి కార్యక్రమానికి సంబంధించిన సంగీత్ ఫంక్షన్ ను చాలా ఘనంగా చేయనున్నారు.

ఈ సంగీత్ కార్యక్రమంలో సూపర్ స్టార్ రజనీకాంత్ స్టెప్పులు వేయనున్నాడని సమాచారం. అలాగే సౌత్ సినీ ఇండస్ట్రీ, బాలీవుడ్ సినీ ఇండస్ట్రీకి సంబంధించిన అగ్ర, స్టార్ నటీనటులు కూడా ఈ సంగీత్ వేడుకకు హాజరుకానున్నారని సమాచారం. ఈ వివాహ వేడుకను 5 రోజుల పాటు ఘనంగా జరుపనున్నారు. సంగీత్ కార్యక్రమంతో మొదలుపెట్టి వివాహ కార్యక్రమంతో ముగించనున్నారు. ఇప్పటికే మంచు వారింట్లో పెళ్లి సందడి మొదలయ్యాయి.