బాలయ్య లయన్ ఆడియోకు 3D ఎఫెక్ట్ సెట్

Posted: 04/03/2015 11:13 AM IST

‘లెజెండ్’ వంటి బ్లాక్ బస్టర్ హిట్ చిత్రం తర్వాత నందమూరి బాలకృష్ణ హీరోగా ‘లయన్’ సినిమా తెరకెక్కుతున్న విషయం తెలిసిందే.  సత్యదేవా దర్శకత్వంలో ఎస్.ఎల్.వి సినిమా సంస్థలో నిర్మాత రుద్రపాటి రమణారావు ఈ చిత్రాన్ని భారీగా నిర్మిస్తున్నారు. మణిశర్మ సంగీతం అందిస్తున్నాడు. బాలయ్య సరసన త్రిష, రాధిక ఆప్టే హీరోయిన్లుగా నటిస్తున్నారు.

ఇటీవలే విడుదలైన ఫస్ట్ లుక్ స్టిల్స్, ట్రైలర్ లకు మంచి స్పందన వస్తోంది. ఇంకా ఈ చిత్ర పోస్టర్లు, థియేటర్ ట్రైలర్ విడుదలకాక ముందే ఈ సినిమాకు భారీ క్రేజ్ ఏర్పడింది. అంచనాలు మరింత పెరిగిపోయాయి. ఇటీవలే ఈ చిత్ర శాటిలైట్ రైట్స్ భారీ రేటుకు అమ్మడు పోయాయి.

ఈ చిత్ర ఆడియో విడుదల కార్యక్రమాన్ని నిర్మాత చాలా గ్రాండ్ గా ప్లాన్ చేస్తున్నట్లుగా తెలిసింది. ఇందుకోసం ప్రత్యేకంగా ఓ 3D సెట్ ను ఏర్పాటు చేసినట్లుగా తెలిసింది. ఈ ఆడియో కార్యక్రమం కోసం దాదాపు 36 లక్షల వరకు ఖర్చుపెడుతున్నట్లుగా తెలిసింది. ఆడియో కార్యక్రమమే ఈ రేంజులో వుంటే.. ఇక సినిమా కోసం ఎంత ఖర్చు చేసారో అని టాలీవుడ్ లో గుసగుసలు వినిపిస్తున్నాయి.

ఏప్రిల్ 9వ తేదిన ‘లయన్’ ఆడియో విడుదల కార్యక్రమం జరుగనుంది. ఈ కార్యక్రమానికి ఆంధ్రప్రదేశ్ రాష్ట్ర ముఖ్యమంత్రి నారా చంద్రబాబు నాయుడు ముఖ్య అతిథిగా విచ్చేయనున్నారు. అలాగే ఈ చిత్రాన్ని ఏప్రిల్ 30న ప్రపంచ వ్యాప్తంగా విడుదల చేయనున్నట్లుగా తెలిసింది. త్వరలోనే అన్ని వివరాలు అధికారికంగా ప్రకటించనున్నారు.