పోలీస్ వాహనంలో కూర్చొని సంచలనం రేపిన వర్మ!

Posted: 03/02/2015 12:47 PM IST

Ram gopal varma police vehicle selfie photos controversy

నిత్యం వివాదాస్పద వ్యాఖ్యలు చేస్తూ సంచలనం సృష్టించే వర్మ.. ఈసారి పోలీస్ వాహనంలో కూర్చొని మరో దుమారం రేపినట్లు తెలుస్తోంది. తాజాగా ఈ దర్శకుడు తెలంగాణ ప్రభుత్వ పోలీస్ వాహనంలో కూర్చొని రెండు ఫోటోలకు పోజులిచ్చాడు. అందులో ఒక ఫోటోకి ‘ఐ యామ్ ది పోలీస్’ అని, మరొక ఫోటోకి ‘నేను అరెస్ట్ అయ్యాను’ అంటూ క్యాప్షన్లు పెట్టుకున్నాడు. ఇప్పుడు ఆ ఫోటోలు సోషల్ మీడియాలో హల్ చల్ చేస్తున్నాయి. వీటిని వీక్షించిన వర్మ అభిమానులు సరదాగా కామెంట్లు చేసుకోగా.. మరికొందరు మాత్రం తీవ్రంగా విమర్శలు గుప్పిస్తున్నారు.

ఈ రెండింటిలో ‘ఐ యామ్ ది పోలీస్’ అంటూ పెట్టిన ఫోటోపై కొందరు తీవ్ర ఆగ్రహం వ్యక్తం చేస్తున్నారు. ‘వర్మ ఒక ప్రముఖ దర్శకుడు కావొచ్చుగానీ.. కేవలం ఒక ఫోటో కోసం ప్రభుత్వ వాహనాన్నే ఎలా వాడుకుంటారు..? అసలు ప్రభుత్వం ఎలా అనుమతి ఇచ్చింది..?’’ అంటూ ఆగ్రహం వెళ్లగక్కుతున్నారు. ‘‘అత్యవసర సమయాల్లో ప్రజలకు రక్షణ కల్పించడానికి ప్రభుత్వం పోలీసులకు ఈ వాహనాలను కేటాయించారు కానీ.. ఇలా సెలబ్రెటీలు ఫోటోలు తీసుకోవడం కోసం కాదు’ అంటూ కొందరు హితువు పలుకుతున్నారు.

ram-gopal-varma-1

ఇక రెండో ఫోటోపై ‘నేను అరెస్ట్ అయ్యాను’ అంటూ వర్మ పెట్టిన క్యాప్షన్ పై తీవ్ర విమర్శలు వస్తున్నాయి. ‘ఫోటోను చూస్తుంటే అరెస్ట్ అయినట్లు లేదు.. పోలీస్ వాళ్లతో కలిసి రైడ్ కి వెళ్లినట్లుంది’ అంటూ కామెంట్లు చేస్తున్నారు. మరికొందరేమో ఈ ఫోటోపై కుళ్లుజోకులు, సెటైర్లు వేసుకుంటూ, పిచ్చిపిచ్చిరాతలు రాసేసుకుంటున్నారు.

అయితే.. ఈ ఫోటోలపై కొందరు విమర్శకులు, సినీ ప్రముఖులు మండిపడుతున్నారు. సినిమా షూటింగ్ నేపథ్యంలో పోలీస్ వాహనాలను అద్దెకు తీసుకోవచ్చుగానీ.. ఇలా ఫోటోల ఫోజుల కోసం ఆ వాహనాలను ఎలా వాడుకుంటారంటూ ప్రశ్నిస్తున్నారు. మొత్తానికి ఈసారి ప్రభుత్వ వాహనాలతో వర్మ మరోసారి వివాదాల్లోకెక్కాడు. మరి ఈ విషయంపై వర్మ ఎలా స్పందిస్తాడో వేచి చూడాల్సిందే!