ఈరోస్ చేతిలో నందమూరి బాలయ్య

Posted: 02/02/2015 09:41 AM IST

ప్రస్తుతం నందమూరి బాలకృష్ణ నటిస్తున్న 98వ చిత్రం ‘లయన్’ షూటింగ్ శరవేగంగా జరుగుతోంది. ఎస్.ఎల్.వి సినిమా సంస్థలో నిర్మాత రుద్రపాటి రమణారావు నిర్మిస్తున్న ఈ చిత్రానికి సత్యదేవా దర్శకత్వం వహిస్తున్నారు. మణిశర్మ ఈ చిత్రానికి సంగీతం అందిస్తున్నాడు.

ఇటీవలే విడుదలైన ఫస్ట్ లుక్ ట్రైలర్ కు భారీ స్పందన వస్తోంది. బాలయ్య సరసన త్రిష, రాధిక ఆప్టే హీరోయిన్లు గా నటిస్తున్నారు. త్వరలోనే ఆడియో విడుదల చేసి, సినిమాను త్వరగా ప్రేక్షకులకు అందించడానికి చిత్ర యూనిట్ సన్నాహాలు చేస్తోంది. ఈ సినిమా ఇంకా పూర్తవ్వకముందే బాలయ్య తన 99వ చిత్రం కోసం ఏర్పాట్లు మొదలెట్లినట్టుగా తెలిసింది.

బాలయ్య చేయబోయే 99వ చిత్రానికి శ్రీవాస్ దర్శకత్వం వహించనున్న విషయం తెలిసిందే. ఈ చిత్రానికి ప్రముఖ రచయితలు కోన వెంకట్, గోపి మోహన్ లు కలిసి కథను అందిస్తున్నారు. ఈ చిత్రాన్ని వైష్ణవి సినిమా బ్యానర్లో శివలెంక కృష్ణ ప్రసాద్ నిర్మించబోతున్నారని వార్తలొచ్చాయి. కానీ తాజా సమాచారం ప్రకారం ఈరోస్ ముందుకొచ్చినట్లుగా తెలిసింది.

తాజా సమాచారం ప్రకారం ప్రముఖ నిర్మాణ సంస్థ అయిన ఈరోస్ ఇంటర్నేషనల్ వారు ఈ సినిమాను నిర్మించనున్నట్లుగా తెలిసింది. త్వరలోనే అధికారికంగా ప్రకటించనున్నారు. ఇప్పటికే ప్రీ ప్రొడక్షన్ పనులు దాదాపు పూర్తయ్యాయని తెలిసింది. ఈ ప్రాజెక్టు ఈనెల చివర్లో సెట్స్ పైకి వెళ్లనున్నట్లుగా తెలిసింది. యాక్షన్ ఎంటర్ టైనర్ గా రూపొందనున్న ఈ చిత్రానికి సంబంధించిన మరిన్ని వివరాలు త్వరలోనే తెలియనున్నాయి.