బాబాయ్ నోటిమాటను లాగేసుకున్న అబ్బాయ్!

Posted: 10/18/2014 08:34 PM IST

యంగ్ టైగర్ జూనియర్ ఎన్టీఆయర్, ‘‘లెజెండ్’’ బాలకృష్ణల మధ్య విభేదాలు వచ్చినట్లు గతంలో ఎన్నో వార్తాకథనాలు వచ్చిన విషయం తెలిసిందే! వ్యక్తిగత కారణాలో లేక రాజకీయపరంగానూ వారిమధ్య విభేదాలు వచ్చాయోలేదో తెలీదు కానీ.. ఇప్పటికీ వీరిమధ్య తగాదాలు వున్నట్లు వార్తలు వస్తూనే వున్నాయి. ఇటీవలే నందమూరి కుటుంబంలో జరిగిన పెళ్లికి జూ.ఎన్టీఆర్ తండ్రి హరికృష్ణ, కళ్యాణ్ రామ్ ఇద్దరూ హాజరయ్యారు కానీ.. ఎన్టీఆర్ మాత్రం కాలేదు. దీంతో వీరిమధ్య ఇంకా వ్యక్తిగత విభేదాలు వుండొచ్చనే అనుమానాలు బలపడుతున్నాయి. ఆమధ్య బాలకృష్ణకు సినిమా షూటింగ్ నేపథ్యంలో ఎన్టీఆర్ స్పందించాడు కానీ... బాలయ్య ఆ విషయం మీద ఏమీ మాట్లాడలేదు. మొత్తంగా చెప్పదలచుకున్నదేమీటంటే... బాలయ్య, ఎన్టీఆర్ ల వ్యక్తిగతంగా ఒకేసారి మీడియా ముందుకు రాకపోవడంతో ఇంకా ఏవో లొసుగులు జరుగుతూనే వున్నాయని పుకార్లు వస్తున్నాయి.

ఇదిలావుండగా... వీరిమధ్య చీలికలున్న విషయం కాస్త పక్కనపెడితే.. తాజాగా జూ.ఎన్టీఆర్ తన బాబాయ్ నోటిమాటను లాగేసుకున్నట్లు వార్తలు వస్తున్నాయి. అయితే ఇది వీరి వ్యక్తిగత వ్యవహారమయితే కాదులెండి... ఒక సినిమాకోసం ఎన్టీఆర్ తన బాబాయ్ నోటిమాటను టైటిల్ గా పెట్టుకున్నట్లు ఫిలింనగర్ సమాచారం! అదేనండి... బాలయ్యా హీరోగా ఇటీవలే విడుదలై సరికొత్త రికార్డులు సృష్టించిన ‘‘లెజెండ్’’ సినిమాలో ‘‘టెంపర్ లేచుద్ది’’ అనే డైలాగ్ లోని ‘‘టెంపర్’’ అనే పదాన్ని తన సినిమా టైటిల్ గా పెట్టుకున్నాడనే వార్తలు ఇండస్ట్రీ వర్గాల్లో జోరందుకున్నాయి. గతంలో పూరీ - ఎన్టీఆర్ సినిమాకు ‘‘నేనోరకం’’ అనే టైటిల్ ను ఖరారుచేసినట్లు వార్తలు వచ్చాయి కానీ.. తర్వాత తమ చిత్రానికి ఇంకా ఏ టైటిల్ అనుకోలేదని దర్శకనిర్మాతలు క్లారిటీ ఇచ్చారు. అయితే తాజాగా ఈ చిత్రానికి ‘‘టెంపర్’’ అనే టైటిల్ ఖరారయినట్లు ఇండస్ట్రీ నుంచి అందుతున్న సమాచారం!

ఈ సినిమాలో ఎన్టీఆర్ సరికొత్త పోలీస్ ఆఫీసర్ గెటప్ లో కనిపించబోతున్నాడనే వార్తలు ఇదివరకే వచ్చాయి. ఈ చిత్రంలో అతని డైలాగ్స్ హైలైట్ గా నిలుస్తాయని యూనిట్ వర్గాలు అంటున్నాయి. ఎన్టీఆర్ సరసన కాజల్ హీరోయిన్ గా నటిస్తున్న ఈ సినిమాను బండ్లగణేష్ నిర్మించనున్నాడు. ‘‘దీపావళి’’ పండుగ సందర్భంగా మూవీ ఫస్ట్ లుక్ రిలీజ్ చేయనున్నట్లు చిత్రబృందం ప్లాన్ చేస్తున్నట్లు సమాచారం. ఏకధాటిగా షూటింగ్ శరవేగంగా జరుపుకుంటున్న ఈ చిత్రాన్ని సంక్రాంతికి విడుదల చేయడానికి సన్నాహాలు చేస్తున్నారు. అయితే ‘‘టెంపర్’’ అనే టైటిల్ ను ఖరారు చేస్తున్నట్లు ఇంకా అధికారికంగా వార్తలు రాలేదు. టైటిల్ సరికొత్తగా వుండేలా దర్శకనిర్మాతలు ఆలోచనల్లో పడిపోయారనే వార్తలు వస్తున్నాయి. మరి ఈ సినిమా టైటిల్ ‘‘టెంపర్’’గా వుంటుందా లేక మారుతుందా..? అనే విషయం తెలియాలంటే మరికొన్ని రోజులు ఆగాల్సిందే!

AS