‘‘మెగా’’భిమానులకు దాసరి పంచ్ డైలాగులు!

Posted: 10/16/2014 08:50 PM IST

Dasari narayana rao small class to mega fans about the clashes between him and chiranjeevi

గతంలో మెగాస్టార్ చిరంజీవి, దర్శకరత్న దాసరి నారాయణరావుల మధ్య విభేదాలు వచ్చిన విషయం తెలిసిందే! అయితే ఆ తర్వాత వీళ్లిద్దరూ అప్పుడప్పుడు కలుసుకోవడం, ముచ్చటించుకోవడం వంటి సందర్భాలు కెమెరాకి చాలాసార్లే దొరికాయి. వ్యక్తిగతంగా ఇప్పటికీ వీరిమధ్య విభేదాలు వున్నాయో లేవో తెలీదు కానీ... తెరమీద మాత్రం అన్యోన్యంగానే కనువిందు చేస్తుంటారు. అయితే ఇంతలోనే ఏమయిందో ఏమో తెలీదు కానీ.. తాజాగా దాసరి మెగాభిమానులకు దిమ్మతిరిగేలా కొన్ని పంచ్ డైలాగులు ఇచ్చినట్లు తెలుస్తోంది. ఇన్నాళ్లవరకు చిరుకు, తనకు మధ్య విభేదాల వ్యవహారాన్ని చర్చించని దాసరి.. మరోసారి ఆ విషయాన్ని తెరమీదకు తీసుకొచ్చారు.

అసలు జరిగిన విషయం ఏమిటంటే.. గతకొంతకాలం నుంచి దాసరి నారాయణరావు ఫేస్ బుక్ ద్వారా తన అభిమానులతో ముచ్చటించడం మొదలుపెట్టారు. సినిమా విషయాలుగానీ, వ్యక్తిగత విషయాలుగానీ, రాజకీయపరంగాగానీ.. ఆయన ప్రతిఒక్క విషయాన్ని సోషల్ మీడియా ద్వారా షేర్ చేసుకుంటున్నారు. అయితే అందులోనే మెగాభిమానుల నుంచి కూడా తీవ్ర విమర్శలను ఎదుర్కొన్నారు. గతంలో దాసరి, చిరుపై చేసిన కొన్ని ఘాటు వ్యాఖ్యానాల నేపథ్యంలో ఇప్పటికీ మెగాఫ్యాన్స్ ఆయనపై కోపంగానే వున్నట్లు తెలుస్తోంది. దీంతో ఫ్యాన్స్ అందరూ ఆయనపై ఫేస్ బుక్ ద్వారా దాడి చేయడం మొదలుపెట్టేశారు. మొదట్లో ఈ విషయాన్ని లైట్ తీసుకున్న దాసరి.. రానురాను మరీ ఎక్కువ కావడంతో వారికి ఒక చిన్న క్లాస్ పీకినట్లు తెలుస్తోంది.

అదేమిటటే.. ‘‘అభిమానులందరూ హీరోల తరఫున నన్ను విమర్శించడం తప్పులేదు కానీ ప్రతి విషయాన్ని నెగెటివ్ గా తీసుకోవడం మంచిది కాదు. పరిశ్రమలో ఎవరికీ ఏది నష్టం వచ్చినా.. వారి తరఫున మాట్లాడటం నాకు అలవాటు. ఒక హీరో అనుకోని పరిస్థితుల్లో చనిపోతే.. ఎవరినో టార్గెట్ చేశానని ఆరోపణలు చేయడం తగదు. అదే నిజాన్ని రాస్తే ‘మా హీరో కూడా పేదవాడేనని’ మరొకరు కామెంట్ చేశారు. ఇటువంటి వ్యాఖ్యలు చేయడం అవసరమా? చనిపోయిన హీరోకి అవకాశాలు లేక ఫోన్ చేసిన పలకించేవాళ్లు లేకపోవడంతో కుమిలిపోయి ఆత్మహత్య చేసుకోవడం అబద్ధమా..? నేనూ పరిశ్రమలో ఒక బాధ్యత గల వ్యక్తిగా ఆ విషాదంపై బాధతో స్పందించాను. అది తప్పా..? ఎవరు చనిపోయినా ఇలాగే స్పందిస్తాను’’ అంటూ మొదట్లో చిన్న క్లాస్ పీకారు.

అలాగే మెగాస్టార్ చిరంజీవి పేరు ఎత్తకుండా ఆయన అభిమానులకు కూడా ఆయన పంచ్ డైలాగులు పేల్చారు. ‘‘అభిమానులందరూ ఏ హీరో కోసం అయితే మీరు నన్ను కామెంట్ చేశారో.. ఆ హీరో మీ అందరికంటే నాకు కావాల్సిన వాడు. ఆత్మీయుడు, బంధువు. నాలా అతను కూడా స్వయంకృషితోనే ఎదిగాడని చాలాసార్లు చెప్పాను. అప్పుడప్పుడు సభల్లో టాప్ హీరోల్లో అతని ప్రస్తావన కూడా తీసుకొచ్చాను. అయినా ఇప్పటికీ మీరంతా వ్యతిరేకంగా భావిస్తూ వ్యాఖ్యానాలు చేయడం ఎంతవరకు సమంజసం?’’ అంటూ అభిమానులనే ప్రశ్నించారు. చివరికి దాసరి ఇక్కడ ఇచ్చిన క్లారిటీ ఏమిటంటే... తనకు, ఇండస్ట్రీలో వున్న ఏ అగ్రహీరోలతోనూ ముఖ్యంగా చిరుతో ఎటువంటి విభేదాలు లేవని స్పష్టం చేసినట్లు తెలుస్తోంది.