అరటిపండు వొలిచిచ్చినా తినలేని సల్మాన్

Posted: 01/29/2014 10:00 AM IST

అన్నీ అమర్చి పెట్టినా నోట్లో వేసుకోలేనట్లు, అరటి పండు వొలిచిచ్చినా తినలేనట్లు ఉందంటున్నారు సల్మాన్ ఖాన్ జయ్ హో చూసినవాళ్ళల్లో చిరంజీవి స్టాలిన్ చూసినవారంతా.  స్టాలిన్ చిత్రం చూడనివాళ్ళు ఇంతోటి కథకు రిమేక్ కూడానా సల్మాన్ కి బుద్దుండాలి అంటున్నారు ఎందుకంటే చిరంజీవి నటించిన సినిమాల్లో బాగా పేరు వచ్చిన సినిమాల్లో స్టాలిన్ ఒకటి అని తెలియదు కనుక.

నిజానికి రిమేక్ చాలా సులభం.  కథ, స్క్రీన్ ప్లే నిర్మాణంలో తోడ్పడటంతో పాటు ఆ సినిమా సాధించిన విజయం కూడా ప్రోత్సాహమిస్తుంది.  ఇదొక్కటే కాదు తెలుగు సినిమా కథలలోని ఆత్మను వదిలేసి పైపై విషయాలను పట్టుకుని సినిమా కథను నాశనం చేసిన సంఘటనలు చాలా ఉన్నాయి. 

రికార్డ్ లను తిరగరాసిన మహేష్ బాబు పోకిరి సినిమా కథను సల్మాన్ ఖాన్ వాంటెడ్ లో చిత్రహింస చేసాడు.  అంతకు ముందు కూడా ఎన్నో మంచి తెలుగు సినిమాలు హిందీలో వాటి సుగంధాన్ని పోగొట్టుకుని కాగితం పూలుగా మారిపోయాయి.  శంకరాభరణం, యమగోల అలాంటివే. 

తెలుగులో స్టాలిన్ చూసి ఇష్టపడ్డ సోహైల్ ఖాన్ దాని శోభను హిందీలోకి తీసుకెళ్ళలేకపోయాడంటే అది దర్శకత్వంలో లోపమే.  మూడొందల కోట్లను వసూలు చేస్తుందనుకున్న జయ్ హో సినిమా మూడు రోజులు ఆడి కూలబడింది.  ఆ మూడు రోజులైనా ఆడటానికి కారణం సల్మాన్ ఖాన్ మీద అభిమానం, శని ఆదివారాలు రావటం.  సినిమా ప్రచారం వలన వచ్చిన క్రేజ్ వలన ఆ మూడు రోజులు కిక్కిరిసి ఆడిన థియేటర్లు బయటకు వచ్చిన టాక్ వలన బోసిపోతున్నాయి.

-శ్రీజ