Posted: 02/08/2012 08:36 PM IST

'అనగనగా ఓ ధీరుడు' సినిమాతో తెరంగేట్రం చేసిన మంచు లక్ష్మీప్రసన్న ఇప్పుడు తమిళంలో తొలి సినిమా చేస్తోంది. అదీ అలాంటిలాంటి సినిమాలో కాదు. ఏకంగా మణిరత్నం డైరెక్ట్ చేస్తున్న 'కడల్'లో. నిన్నటి హీరో కార్తీక్ తనయుడు గౌతం, సమంత జంటగా నటిస్తున్న ఈ సినిమాలో శక్తివంతమైన నెగటివ్ కేరక్టర్ చేస్తోంది. అయితే ఆ సినిమాలో తన కేరక్టర్ గురించి చెప్పేందుకు ఆమె నిరాకరించింది.

నేను మణిరత్నం సినిమాలకి గొప్ప అభిమానిని. మా నాన్న (మోహన్ బాబు) నటులైనా, నేను మణిగారి సినిమాలు చూస్తూ ఈ ఫీల్డులోకి వచ్చాను. చిన్నప్పుడు ఆయన 'గీతాంజలి' సినిమాని ఎన్నోసార్లు చూసి, నాగార్జునతో ప్రేమలోపడ్డాను. అలాంటి నేను మణిగారి ఆఫీసు నుంచి కబురొచ్చేసరికి చాలా థ్రిల్ ఫీలయ్యా. అదే సమయంలో భయం కూడా వేసింది. అయితే ఆయన నన్ను సౌకర్యంగా ఉండేట్లు చేసి, నా పాత్రని గొప్పగా చెప్పారు  అని తెలిపిందామె. ఆడిషన్ ద్వారా ఆ పాత్ర పోషించే అవకాశాన్ని ఆమె దక్కించుకుంది.

తమిళంలో డైలాగులు చెప్పడం ఆమెకేమీ కష్టం కాదు. నేను పుట్టి పెరిగింది చెన్నైలోనే. పదో తరగతి వరకు అక్కడే చదువుకున్నా. రజనీకాంత్ అంకుల్ కుటుంబంతో మా సాన్నిహిత్యం తెలిసిందే. ఐశ్వర్య, సౌందర్య (రజనీ కూతుళ్లు), నేను కలిసి ఆడుకున్నాం. మేం హైదరాబాద్ వచ్చేశాక కూడా రెగ్యులర్ గా మాట్లాడుకుంటూనే ఉన్నాం" అని తెలిపింది లక్ష్మి.