వరుణ్ తేజ్ తో హరీశ్ శంకర్ ‘వాల్మీకి’ లాంచ్..!

Posted: 02/21/2019 03:34 PM IST

Varun tej and harish shankar s valmiki movie launch

మెగా ప్రిన్స్ వరుణ్ తేజ్ హీరోగా తెరకెక్కుతున్న తాజా చిత్రం వాల్మీకి. మాస్ ఆడియన్స్ పల్స్ తెలిసిన దర్శకుడు హరీశ్ శంకర్ ఈ చిత్రానికి దర్శకత్వం వహిస్తున్నాడు. ఈ చిత్రం ఇవాళే పట్టాలెక్కేసింది. ఇవాళ లాంఛనంగా షూటింగ్ ప్రారంభించిన ఈ చిత్రంలో రెండో హీరోగా అథ్వర్వ మురళినీ తీసుకునే అవకాశాలు వున్నట్లుగా వార్తలు వినబడుతున్నాయి. 14 రీల్స్ ప్లస్ బ్యానర్ పై ఈ చిత్రాన్ని నిర్మిస్తున్నారు.

'దువ్వాడ జగన్నాథం' సినిమా తరువాత జోరు తగ్గించుకున్న హరీశ్ శంకర్ అప్పటికే ప్లాన్ చేసుకున్న రెండు ప్రాజెక్టులు పట్టాలెక్కలేదు. దాంతో ఆయనకి ఎక్కువ గ్యాప్ వచ్చేసింది. ఈ మధ్యకాలంలో ఓ రిమేక్ ను రూపోందించే పనిలో పడ్డాడు. తమిళంలో కొంతకాలం క్రితం ఘన విజయాన్ని అందుకున్న 'జిగర్తాండ' సినిమాను రీమేక్ చేయడానికి ఆయన రంగంలోకి దిగాడు.

ఈ రీమేక్ కి 'వాల్మీకి' అనే టైటిల్ ను ఖరారు చేసుకున్న ఆయన ఇవాళే లాంఛనంగా షూటింగ్ ను ప్రారంభించారు. ఈ ఏడాది చివరిలో దసరాకు లేదా క్రిస్ట్ మస్ పండగ సెలవులలో ఈ సినిమాను ప్రేక్షకుల ముందుకు తీసుకురావాలని ఆలోచనలో వున్నారు. ఇది తన కెరియర్లో ఓ డిఫరెంట్ మూవీ అవుతుందనే నమ్మకంతో వరుణ్ తేజ్ వున్నాడు. ఈ సినిమాకి దేవిశ్రీ ప్రసాద్ సంగీత దర్శకుడిగా వ్యవహరిస్తున్నాడు.