'తుంట‌రి' వేషాలేస్తున్న నారా రోహిత్‌

Posted: 10/22/2015 03:25 PM IST

వైవిధ్యభరితమైన కథలతో వరుస సినిమాలు చేసుకుంటూ దూసుకుపోతున్న యంగ్ హీరో నారా రోహిత్.. ఇప్పుడు ‘తుంటరి’ వేషాలేస్తున్నాడు. ఇది నిజం జీవితంలో కాదులెండి.. రీల్ లైఫ్‌లో! ఈ హీరో నటిస్తున్న తాజా చిత్రానికి ‘తుంటరి’ అనే టైటిల్‌ని ఖరారు చేశారు. శ్రీ కీర్తి ఫిలిమ్స్ రూపొందిస్తున్న ఈ సినిమా ఫస్ట్‌లుక్‌ను దసరా రోజున విడుదల చేశారు. శరవేగంగా చిత్రీకరణ జరుపుకుంటున్న ఈ సినిమాకు ప్రముఖ తమిళ దర్శకుడు ఏ.ఆర్.మురుగదాస్ కథను అందించుకున్నారు. అందుకే.. ఈ మూవీ ప్రాధాన్యతను సంతరించుకుంది. ఈ చిత్రం కచ్చితంగా ఘనవిజయం సాధిస్తుందనే నెపంతో.. నిర్మాతలు సైతం ఏ ఒక్కచోట కాంప్రమైజ్ కాకుండా భారీ బడ్జెట్‌తో నిర్మిస్తున్నారని యూనిట్ బృందం తెలుపుతోంది.

‘గుండెల్లో గోదారి’ ఫేమ్ కుమార్ నాగేంద్ర ఈ సినిమాకు ద‌ర్శక‌త్వం వ‌హిస్తున్నారు. అశోక్ బాబా, నాగార్జున్ నిర్మాత‌లుగా వ్యవహరిస్తున్న ఈ సినిమాలో నారా రోహిత్ సరసన లతా హెగ్డే కథానాయికగా నటిస్తోంది. సినిమా టాకీపార్టు ఇటీవ‌లే పూర్తయింది. త్వర‌లోనే పాట‌ల‌ను విడుద‌ల చేయ‌డానికి స‌న్నాహాలు జ‌రుగుతున్నాయి. ఈ చిత్రంలో నారా రోహిత్ న్యూ లుక్‌తో క‌నిపించనున్నాడు. ప్రస్తుతం ప్రేక్షకులు కొత్తదనం కోరుకుంటున్నారు కాబట్టి.. ఆ తరహాలోనే రోహిత్ ప్రయత్నాలు చేస్తున్నాడు. ఈ సినిమా అన్ని క‌మ‌ర్షియ‌ల్ హంగుల‌తో తెర‌కెక్కుతున్నట్టు చిత్ర యూనిట్ స‌భ్యులు తెలిపారు. ఈ చిత్రం నారా రోహిత్ కెరీర్‌లో ఓ మైలురాయిగా నిలుస్తుందని.. అలాగే లతా హెగ్డేకు నాయికగా ఎదిగేందుకు హెల్ప్ అవుతుందని యూనిట్ అభిప్రాయాన్ని వెల్లడిస్తోంది. మరి.. రోహిత్ ‘తుంటరి’ వేషాన్ని తెలుగు ప్రేక్షకులు ఆదరిస్తారో లేదో వేచి చూడాల్సిందే!

ఈ చిత్రానికి కెమెరా: ఎం.ఆర్‌.ప‌ళ‌ని కుమార్‌, మ్యూజిక్: సాయికార్తీక్‌, ఎడిట‌ర్: త‌మ్మిరాజు, ఆర్ట్: ముర‌ళి కొండేటి, స్టంట్స్: వెంక‌ట్‌, కొరియోగ్రఫీ: బాబా భాస్కర్‌, నిర్మాత‌లుః అశోక్ బాబా, నాగార్జున్‌, ద‌ర్శక‌త్వం: కుమార్ నాగేంద్ర‌.