విదేశీయే కాదు స్వదేశీ నల్లకుభేరులను శిక్షించాల్సిందే..!

Posted: 02/21/2015 01:57 PM IST

విదేశాల్లో నల్లధనాన్ని దాచిన కుబేరులను కఠినంగా శిక్షించాలని భారతీయ రిజర్వు బ్యాంకు గవర్నర్ రుఘురామ్ రాజన్ మరోమారు అక్రోశాన్ని వెల్లగక్కారు. నల్లధనం అతి సున్నితమైన అంశంగా పరిగణించిన ఆయన నల్లకుబేరులను శిక్షించడం ద్వారా వాటిని అదుపు చేయవచ్చనన్నారు. ఇందుకోసం చట్టానలు క్రమబద్దీకరించి, పటిష్టంగా అమలు చేయాలని అయన అభిప్రాయపడ్డారు. చట్టాలను ఎవరూ అతిక్రమించకుండా చూడాల్సిన అవసరం వుందన్నారు. చట్టాలను దుర్వినియోగం చేసి, నియమ నిబంధలను గాలికి వదిలేసి విదేశాల్లో డబ్బులు దాచుకనే వారిని శిక్షించాల్సిన అవసరముందన్నారు.

విదేశాల్లోనే కాదు దేశీయంగా కూడా భారీ ఎత్తున బ్లాక్ మనీ మూలుగుతోందని రాజన్ పేర్కొన్నారు. విదేశాల్లో దాచుకున్న వారినే కాకుండా ఇలా దేశీయంగా దాచుకున్న నల్ల ధనం కుబేరులను కూడా పట్టుకుని, శిక్షించాలన్నారు. చట్టాలను పటిష్టంగా అములు చేయడం ద్వారానే దేశీయ నల్లకుభేరుల భరతం పట్టవచ్చని అయన అభిప్రాయపడ్డారు. ఇందుకోసం చట్టాలను పకడ్భందీగా అమలు చేయాల్సిన అవసరం ముందని రాజన్ అన్నారు.

గడిచిన కొన్ని దశాబ్దాలుగా పన్నులు గణనీయంగా తగ్గాయని, ప్రస్తుతం సహేతుక స్థాయిలోనే ఉన్నాయని రాజన్ తెలిపారు. వీటిని కూడా ఎగ్గొడితే పన్నుల వ్యవస్థను అవహేళన చేసినట్లేనన్నారు. ‘ప్రజలు పన్నులు కట్టేందుకు తగిన అవకాశం ఇవ్వాలి. అప్పటికీ కట్టకపోతే అప్పుడు శిక్షించాలి. పన్నులు ఎగ్గొడితే శిక్ష తప్పదు అన్న విషయం స్పష్టంగా తెలియాలి. ఇందుకోసం పన్నుల వ్యవస్థను పటిష్టం చేయాలి’ అని వ్యాఖ్యానించారు. ప్రజలకు ఉద్యోగావకాశాలు కల్పించడం ముఖ్యమని, ఇందుకోసం ప్రభుత్వం సరైన విధానాలను రూపొందించాల్సి ఉంటుందని రఘురామ్ రాజన్ అభిప్రాయపడ్డారు.

జి మనోహర్